Qatar Suriyadagi terrorchilarga millionlab dollar miqdorida moliyaviy yordam ko‘rsatishda ayblanmoqda. Bu haqda Daily Mail xabar berdi.
Qatarning moliyalashtirgani taxmin qilinayotgan jangari guruhlar tomonidan qiynoqqa solish va qatl etish tahdidi ostida garovga olingan Suriyaning to‘qqiz nafar fuqarosi tovon puli talab qilib London Oliy sudiga da’vo arizasini kiritdi. Jabrlanganlar mamlakatning yetakchi siyosatchilarini, tadbirkorlarni, xayriya va notijorat tashkilotlarini xususiy ofis va ikkita bankdan foydalanib, yuz millionlab dollarlarni “Al-Qoida” terrorchi tashkilotining “Al-Nusra” guruhiga yo‘naltirishda aybladi.
Sudda taqdim etilgan hujjatlarga ko‘ra, Qatar hukumati Suriyadagi fuqarolar urushi paytida jangarilarni “faol qo‘llab-quvvatlash va moliyalashtirish” noqonuniy tizimini tashkil etgan. Ta’kidlanishicha, pul o‘tkazish uchun qurilish shartnomalari va ko‘chmas mulkka nisbatan yuqori narx belgilash, shuningdek, suriyalik ishchilarga qo‘shimcha to‘lovlar yo‘li bilan firibgarliklar qilingan. Terrorchilarni moliyalashtirishga mamlakatning Qatar National Bank va Doha Bank kabi eng yirik banklarining ham aloqador ekani aytilmoqda.
Nashrning xabar berishicha, barcha gumonlanuvchilar qo‘yilgan ayblovlarni rad etmoqda. Ta’kidlanishicha, ishonchli dalillar keltirilsa, tergov-surishtiruv ishlari davom etadi.
2017-yilda Saudiya Arabistoni, Misr, Bahrayn va BAA davlatlari Qatar bilan diplomatik aloqalarning to‘xtatilganini ma’lum qilgan edi. Ushbu mamlakatlar vakillari Dohani arab davlatlaridagi ichki siyosiy vaziyatni muvozanatdan chiqarishda, shuningdek, terrorchilik tashkilotlarini qo‘llab-quvvatlashda aybladi. Keyinchalik boykotga Yaman, Liviya, Maldiv, Mavrikiya, Mavritaniya. Komor orollari ittifoqi ham qo‘shildi. 2021-yilning yanvar oyida arab mamlakatlari Qatarga nisbatan diplomatik cheklovlarning bekor qilinganini ma’lum qildi.
Izoh (0)