Suriya Inson huquqlariga rioya qilinishi ustidan nazorat markazi (SOHR) hisob-kitoblariga ko‘ra, fuqarolik urushi boshlanganidan buyon 10 yil davomida mamlakatda 494 438 kishi halok bo‘ldi. SOHR bayonnomasida ma’lum qilinishicha, halok bo‘lganlarning 160 ming nafari tinch aholi, shu jumladan, 25 ming nafarini 18 yoshgacha bo‘lgan bolalar tashkil qiladi.

Foto: DW

Bundan tashqari, 80 mingga yaqin suriyalik isyonchilar, 91 ming nafar Suriya armiyasi harbiysi, 40 ming nafar IShID va 28 mingga yaqin “Hayyat Tahrir ash-Shom” guruhi jangarilari halok bo‘ldi.

SOHR hisob-kitoblariga ko‘ra, bu vaqt ichida Suriyaning 2,1 milliondan ortiq aholisi turli darajadagi jarohatlar oldi yoki nogiron bo‘lib qoldi. Taxminan, 13 million aholi doimiy yashash joylarini tark etishga majbur bo‘ldi.

Avvalroq Rossiya Havo-kosmik kuchlari (HKK) samolyotlarining Suriyadagi aviazarbasi oqibatida, taxminan, 200 nafar jangari yo‘q qilindi. Natijada terrorchilarning ikkita yashirin joyi, yirik kalibrli pulemyot bilan jihozlangan 24 ta pikapi, shuningdek, taxminan, 500 kilogramm o‘q-dori va qo‘lbola portlovchi moslamalarni yasash uchun zarur qismlar yo‘q qilindi.

Shuningdek, Iroq Qurolli Kuchlari IShID yetakchilaridan biri — “Dajla amiri”ni qo‘lga oldi. Undan oldin Iroqda AQSh boshchiligidagi xalqaro koalitsiya tomonidan amalga oshirilgan aviazarba oqibatida ham IShID terrorchilik tashkilotining rahbarlaridan biri o‘ldirilgan edi.