Қатар Суриядаги террорчиларга миллионлаб доллар миқдорида молиявий ёрдам кўрсатишда айбланмоқда. Бу ҳақда Daily Mail хабар берди.
Қатарнинг молиялаштиргани тахмин қилинаётган жангари гуруҳлар томонидан қийноққа солиш ва қатл этиш таҳдиди остида гаровга олинган Суриянинг тўққиз нафар фуқароси товон пули талаб қилиб Лондон Олий судига даъво аризасини киритди. Жабрланганлар мамлакатнинг етакчи сиёсатчиларини, тадбиркорларни, хайрия ва нотижорат ташкилотларини хусусий офис ва иккита банкдан фойдаланиб, юз миллионлаб долларларни «Ал-Қоида» террорчи ташкилотининг «Ал-Нусра» гуруҳига йўналтиришда айблади.
Судда тақдим этилган ҳужжатларга кўра, Қатар ҳукумати Суриядаги фуқаролар уруши пайтида жангариларни «фаол қўллаб-қувватлаш ва молиялаштириш» ноқонуний тизимини ташкил этган. Таъкидланишича, пул ўтказиш учун қурилиш шартномалари ва кўчмас мулкка нисбатан юқори нарх белгилаш, шунингдек, суриялик ишчиларга қўшимча тўловлар йўли билан фирибгарликлар қилинган. Террорчиларни молиялаштиришга мамлакатнинг Qatar National Bank ва Doha Bank каби энг йирик банкларининг ҳам алоқадор экани айтилмоқда.
Нашрнинг хабар беришича, барча гумонланувчилар қўйилган айбловларни рад этмоқда. Таъкидланишича, ишончли далиллар келтирилса, тергов-суриштирув ишлари давом этади.
2017 йилда Саудия Арабистони, Миср, Баҳрайн ва БАА давлатлари Қатар билан дипломатик алоқаларнинг тўхтатилганини маълум қилган эди. Ушбу мамлакатлар вакиллари Доҳани араб давлатларидаги ички сиёсий вазиятни мувозанатдан чиқаришда, шунингдек, террорчилик ташкилотларини қўллаб-қувватлашда айблади. Кейинчалик бойкотга Яман, Ливия, Мальдив, Маврикия, Мавритания. Комор ороллари иттифоқи ҳам қўшилди. 2021 йилнинг январь ойида араб мамлакатлари Қатарга нисбатан дипломатик чекловларнинг бекор қилинганини маълум қилди.
Изоҳ (0)