AQSh suriyaliklarga gumanitar yordam tariqasida 596 million dollar ajratadi, deb ma’lumot berdi AQShning BMTdagi doimiy vakili Linda Tomas-Grinfild Suriyani qo‘llab-quvvatlashga bag‘ishlangan “Bryussel-5” videokonferensiyasida. Uning bayonoti Davlat departamenti saytida namoyish etildi. Shuningdek, AQSh Suriya prezidenti Bashar Asad rejimi va Rossiya xatti-harakatlarini qoraladi. Bu haqda “Kommersant” xabar berdi.

Foto: AP Photo

Xabarda ta’kidlanishicha, AQShning yordami Suriyaning 13,4 million aholisiga va Turkiya, Livan, Iordaniya, Iroq va Misrdagi 5,6 million qochqinga foyda keltiradi. AQShning so‘nggi o‘n yilda ko‘rsatgan jami gumanitar yordamlarining umumiy qiymati 13 milliard dollarga yetdi.

“Suriya xalqi Asad rejimi va Rossiyaning havodan zarbalari, garovga olish, IShID qabohatlari va kimyoviy qurol bilan hujumlari kabi son-sanoqsiz vahshiyliklarga duchor bo‘ldi”, — deyiladi Davlat departamenti xabarida. Shuningdek, Vashington tizimli korrupsiya va Bashar Asadning samarasiz iqtisodiy harakatlari inqirozni yanada kuchaytirdi, deb hisoblaydi.

2021-yilning fevral oyida Jo Bayden Suriya—Eron chegarasi hududidagi eronparast kuchlarga tegishli bo‘lgan obyektlarga hujum qilishni ma’qulladi. Operatsiya Iroqning Amerika obyektlariga qilgan hujumiga javob bo‘ldi.

Natijada Demokratlar va Respublikachilar partiyalaridan senatorlar Tim Keyn va Todd Yang prezidentning harbiy kuch ishlatishdagi vakolatlarini cheklash to‘g‘risidagi qonun loyihasini taqdim etdi. Ilgari senatorlar prezident Donald Tramp davrida ham xuddi shunday qonun loyihasini ilgari surgan, ammo davlat rahbarining vetosidan o‘tolmagan.