Nima uchun ayrim vaksinalarni ikki yoki uch marta olish kerak? Bu ularning samaradorligi bilan bog‘liqmi? Ushbu savollarga mutaxassis javob berdi

Koronavirusga qarshi kurashish shtabi a’zosi Sevara Ubaydullayeva AOKAda o‘tkazilgan brifingda nega vaksinalarni ikki yoki uch marta olish kerakligi haqida ma’lumot berdi.

“Koronavirusga qarshi vaksinalardan ‘Sputnik V’ va AstraZeneca 2 bosqichli emlanish bilan inson organizmida yuqori darajada immunitet hosil qilinishiga yordam beradi.

‘Sputnik V’ vaksinasining 2 bosqich emlanishi uchun birinchi va ikkinchi komponentlari mavjud bo‘lib, har bir emlangan odam maxsus birinchi va ikkinchi komponentni to‘liq olishi bilan organizmida immun himoya ishlab chiqishi mumkin.

ZF-UZ-VAC 2001 esa 3 bosqichli emlanish bilan immunitet hosil qilishga yordam beradi. To‘liq uchinchi bosqichda emlangandan so‘ng inson organizmida immunitet hosil bo‘lishiga erishish mumkin.

Vaksinalar 2 yoki 3 bosqichli bo‘lsa-da, ularning barchasini sifati va emlashdan keyin hosil bo‘ladigan immunitet darajasiga ko‘ra samaradorligi bir xil va yuqorida darajada immun himoya ishlab chiqilishiga hissa qo‘shadi”, — deydi Sevara Ubaydullayeva.

Bundan avval O‘zbekistonda koronavirusga qarshi qo‘llanilgan vaksinalar soni 2 million dozadan oshgani, o‘zbek—xitoy vaksinasi bilan emlanganlarga 3-dozani qo‘llash boshlangani hamda O‘zbekistonda koronavirusga qarshi vaksinaning 2-dozasini olganlar soni qariyb 500 ming nafarga yetgani haqida xabar berilgandi.