O‘zbekistonning Nyu-Yorkdagi bosh konsulxonasi vakillari Ogayo shtatining Sinsinnati shahrida istiqomat qiluvchi vatandoshlar uchun sayyor konsullik qabuli o‘tkazdi, deb xabar berdi “Dunyo” axborot agentligi.
Tadbir davomida bosh konsulxona vakillari Hamkor Uz Cincinati Association o‘zbek diasporasi tashkiloti rahbariyati va faollari bilan muzokaralar o‘tkazgan. O‘zbekiston mustaqilligining 30 yilligiga bag‘ishlangan bayram tadbirlarini o‘tkazish bilan bog‘liq tashkiliy masalalar muhokama qilingan. Milliy bayramlar va respublikada o‘tayotgan muhim ijtimoiy-siyosiy voqealar munosabati bilan birgalikda tadbirlar tashkil etish to‘g‘risida o‘zaro kelishuvga erishilgan. Tomonlar Amerika jamoatchiligi orasida o‘zbek xalqining boy tarixiy-madaniy merosi haqida ko‘proq ma’lumot tarqatishga qaratilgan qo‘shma sa’y-harakatlar rejasini ishlab chiqishga qiziqish bildirgan.
Muloqot davomida bosh konsulxona delegatsiyasi Sinsinnati shahrida shayx Muhammad Sodiq Muhammad Yusuf nomidagi O‘zbekiston jome masjidi qurilishiga tayyorgarlik ishlarining borishi bilan ham tanishgan. Hamkor Uz Cincinati Association mulki o‘laroq 8665 State Route 48, Maineville, Ohio 45039 manzilida joylashgan 2,7 gektar maydon ko‘zdan kechirilgan.
Ayni paytda Hamkor Uz Cincinati Association o‘zbek diasporasi tashkiloti Ogayo shtatining arxitektura va qurilish kompaniyalari o‘rtasida qurilajak binoni loyihalash va dizayn smetalarini tayyorlash bo‘yicha tanlov e’lon qilgan. Majmua hududida 600—700 kishiga mo‘ljallangan ibodat uchun asosiy bino, tahorat olish xonalari va boshqa maxsus yordamchi inshootlar va 100 dan ortiq avtomobil uchun to‘xtash joyi barpo etiladi. Shuningdek, majmuada Hamkor Uz Cincinati Association o‘zbek diasporasi vakolatxonasi hamda o‘zbek tili va adabiyoti, odobnoma va boshqa fanlar bo‘yicha vatandoshlarimiz farzandlari o‘qiydigan sinf xonalari joylashadi.
Loyiha AQShda yashovchi vatandoshlar tomonidan amalga oshiriladigan ehson mablag‘lari hisobiga moliyalashtiriladi.
Eslatib o‘tamiz, 2019-yilning mayida Toshkentning Chilonzor tumanidagi So‘galli ota ziyoratgohi yonidagi masjidga shayx Muhammad Sodiq Muhammad Yusuf nomi berilgandi.
Izoh (0)