АҚШда шайх Муҳаммад Содиқ Муҳаммад Юсуф номидаги масжид қурилади

Ўзбекистоннинг Нью-Йоркдаги бош консулхонаси вакиллари Огайо штатининг Цинциннати шаҳрида истиқомат қилувчи ватандошлар учун сайёр консуллик қабули ўтказди, деб хабар берди «Дунё» ахборот агентлиги.

Тадбир давомида бош консулхона вакиллари Hamkor Uz Cincinati Association ўзбек диаспораси ташкилоти раҳбарияти ва фаоллари билан музокаралар ўтказган. Ўзбекистон мустақиллигининг 30 йиллигига бағишланган байрам тадбирларини ўтказиш билан боғлиқ ташкилий масалалар муҳокама қилинган. Миллий байрамлар ва республикада ўтаётган муҳим ижтимоий-сиёсий воқеалар муносабати билан биргаликда тадбирлар ташкил этиш тўғрисида ўзаро келишувга эришилган. Томонлар Америка жамоатчилиги орасида ўзбек халқининг бой тарихий-маданий мероси ҳақида кўпроқ маълумот тарқатишга қаратилган қўшма саъй-ҳаракатлар режасини ишлаб чиқишга қизиқиш билдирган.

Мулоқот давомида бош консулхона делегацияси Цинциннати шаҳрида шайх Муҳаммад Содиқ Муҳаммад Юсуф номидаги Ўзбекистон жоме масжиди қурилишига тайёргарлик ишларининг бориши билан ҳам танишган. Hamkor Uz Cincinati Association мулки ўлароқ 8665 State Route 48, Maineville, Ohio 45039 манзилида жойлашган 2,7 гектар майдон кўздан кечирилган.

Айни пайтда Hamkor Uz Cincinati Association ўзбек диаспораси ташкилоти Огайо штатининг архитектура ва қурилиш компаниялари ўртасида қурилажак бинони лойиҳалаш ва дизайн сметаларини тайёрлаш бўйича танлов эълон қилган. Мажмуа ҳудудида 600—700 кишига мўлжалланган ибодат учун асосий бино, таҳорат олиш хоналари ва бошқа махсус ёрдамчи иншоотлар ва 100 дан ортиқ автомобиль учун тўхташ жойи барпо этилади. Шунингдек, мажмуада Hamkor Uz Cincinati Association ўзбек диаспораси ваколатхонаси ҳамда ўзбек тили ва адабиёти, одобнома ва бошқа фанлар бўйича ватандошларимиз фарзандлари ўқийдиган синф хоналари жойлашади.

Лойиҳа АҚШда яшовчи ватандошлар томонидан амалга ошириладиган эҳсон маблағлари ҳисобига молиялаштирилади.

Эслатиб ўтамиз, 2019 йилнинг майида Тошкентнинг Чилонзор туманидаги Сўгалли ота зиёратгоҳи ёнидаги масжидга шайх Муҳаммад Содиқ Муҳаммад Юсуф номи берилганди.