Qashqadaryo yaylovlarida zararli chigirtkalarga qarshi kurashish tadbirlari boshlandi. Bu haqda viloyat hokimining matbuot kotibi o‘zining Telegram’dagi kanali orqali ma’lum qildi.
Ma’lum qilinishicha, Qashqadaryo hokimi Zoir Mirzayev rahbarligidagi ishchi guruh viloyatning chegara hududlarida o‘rganish olib borganida, qo‘shni respublika hududidan Dehqonobod tumani Xo‘japalas qishlog‘i yaylovlariga, shuningdek, G‘uzor tumani (“Taxam”, “Janqara”, “Kengsoy”) yaylovlariga zararli Marokash chigirtkalarining katta to‘dalari uchib o‘tayotgani aniqlangan.
Ishchi guruh rahbari tomonidan tezkorlik bilan ushbu hududlarda otryadlar tuzilib, ularga 74 turdagi ishlov tadbirlarini amalga oshirish texnikalari jalb etilgan, zararli chigirtkalarga qarshi samarali kimyoviy ishlovlar o‘tkazish ishlari boshlab yuborilgan. Shuningdek, 24 soat ishlaydigan maxsus shtab tashkil etilgan.
“Vohada 2021-yilda zararli chigirtkalarga qarshi 140 ming gektar maydonga kimyoviy ishlovlar o‘tkazilishi bashorat qilingan bo‘lib, shundan, G‘uzor, Dehqonobod, Qamashi, Nishon, Mirishkor, Chiroqchi va Shahrisabz tumanlari yaylovlarida 88,5 ming gektar maydonda kimyoviy ishlovlar berish yakunlandi”, — deyiladi xabarda.
Ishchi guruh rahbari Zoir Mirzayev “O‘zagrokimyohimoya” AJ chigirtka va tut parvonasiga qarshi kurashish xizmati Qashqadaryo filiali boshlig‘i G‘ayrat Jo‘rayev bilan muloqot qilib, zararli chigirtkalarga qarshi kurashish ishlari uchun zaruriy qo‘shimcha mablag‘larni ajratishini bildirgan. Ushbu mablag‘lar yana 20 ming gektar yaylovlarga ishlov tadbirlari olib borish uchun kimyoviy vositalar, yoqilg‘i va texnikalar uchun ehtiyot qismlar xarid qilishga sarflanadi.
Mas’ullarning qayd etishlaricha, 10-iyunga qadar ushbu zararli chigirtkalarga qarshi samarali ishlar amalga oshirilib, boshqa viloyatlarga kirib bormasidan yo‘q qilinishiga erishiladi.
Avvalroq Favqulodda vaziyatlar vazirining matbuot kotibi Murod Sodiqov O‘zbekistonda zararli chigirtkalar bilan kurashish mavsumi boshlanganini ma’lum qilgandi. Favqulodda vaziyatlar hamda Qishloq xo‘jaligi vazirliklari bilan o‘zaro hamkorlikda 2021-yilda hashoratlar tahdid qilishi mumkin bo‘lgan taxminiy ekin maydonlari hisoblab chiqilgan. Bu deyarli 600 ming gektar qir-adir yerlardir.
Izoh (0)