Қашқадарё яйловларида зарарли чигирткаларга қарши курашиш тадбирлари бошланди. Бу ҳақда вилоят ҳокимининг матбуот котиби ўзининг Telegram’даги канали орқали маълум қилди.
Маълум қилинишича, Қашқадарё ҳокими Зоир Мирзаев раҳбарлигидаги ишчи гуруҳ вилоятнинг чегара ҳудудларида ўрганиш олиб борганида, қўшни республика ҳудудидан Деҳқонобод тумани Хўжапалас қишлоғи яйловларига, шунингдек, Ғузор тумани («Тахам», «Жанқара», «Кенгсой») яйловларига зарарли Марокаш чигирткаларининг катта тўдалари учиб ўтаётгани аниқланган.
Ишчи гуруҳ раҳбари томонидан тезкорлик билан ушбу ҳудудларда отрядлар тузилиб, уларга 74 турдаги ишлов тадбирларини амалга ошириш техникалари жалб этилган, зарарли чигирткаларга қарши самарали кимёвий ишловлар ўтказиш ишлари бошлаб юборилган. Шунингдек, 24 соат ишлайдиган махсус штаб ташкил этилган.
«Воҳада 2021 йилда зарарли чигирткаларга қарши 140 минг гектар майдонга кимёвий ишловлар ўтказилиши башорат қилинган бўлиб, шундан, Ғузор, Деҳқонобод, Қамаши, Нишон, Миришкор, Чироқчи ва Шаҳрисабз туманлари яйловларида 88,5 минг гектар майдонда кимёвий ишловлар бериш якунланди», — дейилади хабарда.
Ишчи гуруҳ раҳбари Зоир Мирзаев «Ўзагрокимёҳимоя» АЖ чигиртка ва тут парвонасига қарши курашиш хизмати Қашқадарё филиали бошлиғи Ғайрат Жўраев билан мулоқот қилиб, зарарли чигирткаларга қарши курашиш ишлари учун зарурий қўшимча маблағларни ажратишини билдирган. Ушбу маблағлар яна 20 минг гектар яйловларга ишлов тадбирлари олиб бориш учун кимёвий воситалар, ёқилғи ва техникалар учун эҳтиёт қисмлар харид қилишга сарфланади.
Масъулларнинг қайд этишларича, 10 июнга қадар ушбу зарарли чигирткаларга қарши самарали ишлар амалга оширилиб, бошқа вилоятларга кириб бормасидан йўқ қилинишига эришилади.
Аввалроқ Фавқулодда вазиятлар вазирининг матбуот котиби Мурод Содиқов Ўзбекистонда зарарли чигирткалар билан курашиш мавсуми бошланганини маълум қилганди. Фавқулодда вазиятлар ҳамда Қишлоқ хўжалиги вазирликлари билан ўзаро ҳамкорликда 2021 йилда ҳашоратлар таҳдид қилиши мумкин бўлган тахминий экин майдонлари ҳисоблаб чиқилган. Бу деярли 600 минг гектар қир-адир ерлардир.
Изоҳ (0)