J-United Group reklamasidagi noto‘g‘ri ma’lumotlar tufayli “Ashxobod” bog‘iga tashrif buyuruvchilarga tovon pulini to‘lashi kerak. Bu haqda Monopoliyaga qarshi kurashish qo‘mitasi huzuridagi Iste’molchilar huquqlarini himoya qilish agentligi xabar berdi.
Agentlikning ma’lumotlariga ko‘ra, 2020-yilning dekabr oyida “Ashxobod” sayilgohi faoliyati bo‘yicha, ya’ni reklamada va’da qilingan shartlar Yangi yil bayrami (2020-yilning 25–27-dekabr) kunlarida ta’minlanmaganligi to‘g‘risida “Potrebitel.uz” guruhida iste’molchining shikoyati qoldirilgan.
Agentlik iste’molchilarning nomuayyan doirasi huquqlari va manfaatlarini himoya qilish maqsadida ushbu masalani o‘rganib chiqdi. O‘rganishlarda sayilgohga tashrif buyuruvchilarni chalg‘ituvchi noto‘g‘ri va noaniq ma’lumotlarni reklama bannerida joylashtirgani, oqibatda sayilgoh tomonidan iste’molchilar huquqlari va reklama to‘g‘risidagi amaldagi qonunchilik normalari buzilgani ma’lum bo‘ldi.
“Iste’molchilarning huquqlarini himoya qilish to‘g‘risida”gi qonunga muvofiq (6-moddasi) ijrochi iste’molchiga o‘zi realizatsiya qilayotgan ish va xizmatlar haqida o‘z vaqtida zarur, to‘g‘ri va tushunarli ma’lumot berishi shart.
Agentlik komissiyasining qarori asosida va qonun hujjatlariga muvofiq J-United Group MChJ ijtimoiy tarmoq posti muallifiga, shuningdek, 2020-yilning 25—27-dekabr kunlari noto‘g‘ri reklama olgan boshqa iste’molchilarga ham pul mablag‘lari ko‘rinishidagi yetkazilgan moddiy zarar (faqat kirish uchun) qaytarilishini ta’minlashi bo‘yicha ko‘rsatma berildi.
Shundan so‘ng istirohat bog‘i ma’muriyati qaror va chiqarilgan buyruqqa rozi bo‘lmagan holda sudga murojaat qildi. 17-may kuni Toshkent tumanlararo ma’muriy sudida mazkur ishni ko‘rib chiqish natijalari bo‘yicha agentlik tomonidan qabul qilingan qarorni o‘z kuchida qoldirish va J-United Group MChJga chiqarilgan ko‘rsatmani ijro etish to‘g‘risida qaror qabul qilindi.
Korxonalar va tashkilotlarning yagona davlat reyestri ma’lumotlariga ko‘ra, 2002-yil avgust oyida ro‘yxatdan o‘tgan J-United Group kompaniyasining yagona asoschisi Toshkent shahri hokimi Jahongir Ortiqxo‘jayev hisoblanadi.
Bundan avval Toshkentdagi Central Park tashrif buyuruvchilarga 335 million so‘mdan ortiq pulni qaytarib berishi haqida xabar berilgandi.
Izoh (0)