Kiprning Lamanka Enterprises Limited kompaniyasi “Ohangaronsement” AJning 4,14 million oddiy aksiyalari yoki ustav kapitalining 84,197 foizi egasiga aylandi. Bu haqda “Toshkent” fond birjasi ma’lumotlariga tayanib, “Gazeta.uz” xabar berdi.
Aksiyalar paketining oldi-sotdi bitimi 25-may kuni ro‘yxatdan o‘tkazilgan. Bitim qiymati 557,68 milliard so‘mni tashkil etib, fond birjasidagi eng yirik bitimga aylangan, deb yozadi “KorpInfo”. Dastavval bitim 429 milliard so‘m miqdorida bo‘lishi taxmin qilingandi.
Lamanka Enterprises Limited Kiprda 2018-yilning 15-noyabrida ro‘yxatdan o‘tkazilgan. Direktori sifatida Andreas Nianias ko‘rsatilgan bo‘lib, uning ismi Shveysariyaning Eurocement Holding AG xoldingi direktorlar kengashining yagona a’zosiga mos kelmoqda.
“Ohangaronsement” haqida
“Ohangaronsement”ga XX asrning o‘rtalarida asos solingan. 1970-yillarda kombinatga, 1980-yillarda esa ishlab chiqarish birlashmasiga aylangan. 1994-yilda zavod xususiylashtirilgan va aksiyadorlik jamiyatiga aylantirilgan. Korxonaga uzoq vaqt davomida Zeromax egalik qilgan va Rossiyaning “Yevrosement”i 2006-yilda 75,5 foiz aksiyasini sotib olgan. Keyinchalik ushbu ulush 83,9 foizga qadar oshirilgan.
Spot’ning yozishicha, 2014-yilda korxona muammolarga duch kelgan — hozirda faoliyati tugatilgan Davlat raqobat qo‘mitasi 1994-yildagi xususiylashtirishni noqonuniy deb topishni talab qilgan, Toshkent viloyati iqtisodiy sudi zavodning mulki va bank hisobraqamlariga hibs qo‘ygan. Bundan tashqari, korxonadan soliqlarni to‘lash talab etilgan. Bir nechta sud eshituvlari va apellyatsiyalardan so‘ng tomonlar masalani kelishib olishga muvaffaq bo‘lgan.
“Ohangaronsement” mamlakatdagi eng yirik soliq to‘lovchilar qatoriga kiradi, shuningdek, bozordagi yetakchi kompaniyalardan biri hisoblanadi. 2019-yil yakunlariga ko‘ra, zavodning sof foydasi 179,8 milliard so‘mni tashkil etgan, 2020-yilning 9 oyida esa 187,1 milliard so‘m, 2021-yilning birinchi choragi yakunlari bo‘yicha — 24,8 milliard so‘m.
Izoh (0)