25-may kuni Jizzax viloyatining Yangiobod tumanini Tojikiston bilan chegaradosh Havotog‘ qishlog‘i hududidagi ochiq maydonda yong‘in sodir bo‘ldi. Bu haqda viloyati FVB axborot xizmati xabar berdi.
Ma’lumotlarga ko‘ra, shu kuni soat 12:05 da viloyat Favqulodda vaziyatlar boshqarmasiga yong‘in yuzaga kelgani to‘g‘risida xabar kelib tushgan.
Yong‘inni bartaraf etishda 3 ta yong‘in-qutqaruv bo‘linmasi, 32 nafar harbiy xizmatchi hamda ko‘ngilli fuqarolar qatnashgan. Birinchi bo‘linma chaqirilgan manzilga soat 12:40 da yetib borgan (eng yaqin yong‘in-qutqaruv qismigacha masofa 30 kilometr).
Ko‘rilgan tezkor harakatlar natijasida yong‘in soat 12:58 da o‘rab olingan va 15:00 da to‘liq bartaraf etilgan. Tan jarohati olgan va halok bo‘lganlar yo‘q. Yong‘in oqibatida 15 gektar ochiq maydonda quruq o‘t, shox-shabba va daraxtlar yongan. Yong‘inning taxminiy sababi – ochiq olovdan foydalanishda ehtiyotsizlik.
Hozirda ko‘rilgan moddiy zarar miqdori aniqlanmoqda.
Avvalroq Andijondagi “O‘zbegim” savdo majmuasida yong‘in yuz bergani, Urgutdagi dehqon bozorida yong‘in chiqqani hamda Sergelidagi beshta hovlining yonib ketishiga suv yetishmovchiligi va yo‘llardagi tirbandlik sabab qilib ko‘rsatilgani haqida xabar berilgandi.
Izoh (0)