Кипрнинг Lamanka Enterprises Limited компанияси «Оҳангаронцемент» АЖнинг 4,14 миллион оддий акциялари ёки устав капиталининг 84,197 фоизи эгасига айланди. Бу ҳақда «Тошкент» фонд биржаси маълумотларига таяниб, «Gazeta.uz» хабар берди.
Акциялар пакетининг олди-сотди битими 25 май куни рўйхатдан ўтказилган. Битим қиймати 557,68 миллиард сўмни ташкил этиб, фонд биржасидаги энг йирик битимга айланган, деб ёзади «KorpInfo». Даставвал битим 429 миллиард сўм миқдорида бўлиши тахмин қилинганди.
Lamanka Enterprises Limited Кипрда 2018 йилнинг 15 ноябрида рўйхатдан ўтказилган. Директори сифатида Андреас Нианиас кўрсатилган бўлиб, унинг исми Швейцариянинг Eurocement Holding AG холдинги директорлар кенгашининг ягона аъзосига мос келмоқда.
«Оҳангаронцемент» ҳақида
«Оҳангаронцемент»га ХХ асрнинг ўрталарида асос солинган. 1970 йилларда комбинатга, 1980 йилларда эса ишлаб чиқариш бирлашмасига айланган. 1994 йилда завод хусусийлаштирилган ва акциядорлик жамиятига айлантирилган. Корхонага узоқ вақт давомида Zeromax эгалик қилган ва Россиянинг «Евроцемент»и 2006 йилда 75,5 фоиз акциясини сотиб олган. Кейинчалик ушбу улуш 83,9 фоизга қадар оширилган.
Spot’нинг ёзишича, 2014 йилда корхона муаммоларга дуч келган — ҳозирда фаолияти тугатилган Давлат рақобат қўмитаси 1994 йилдаги хусусийлаштиришни ноқонуний деб топишни талаб қилган, Тошкент вилояти иқтисодий суди заводнинг мулки ва банк ҳисобрақамларига ҳибс қўйган. Бундан ташқари, корхонадан солиқларни тўлаш талаб этилган. Бир нечта суд эшитувлари ва апелляциялардан сўнг томонлар масалани келишиб олишга муваффақ бўлган.
«Оҳангаронцемент» мамлакатдаги энг йирик солиқ тўловчилар қаторига киради, шунингдек, бозордаги етакчи компаниялардан бири ҳисобланади. 2019 йил якунларига кўра, заводнинг соф фойдаси 179,8 миллиард сўмни ташкил этган, 2020 йилнинг 9 ойида эса 187,1 миллиард сўм, 2021 йилнинг биринчи чораги якунлари бўйича — 24,8 миллиард сўм.
Изоҳ (0)