Jons Hopkins universiteti ma’lumotlariga ko‘ra, dunyoda koronavirusga chalinganlar soni 168 427 774 kishiga yetdi. Virusdan vafot etganlar soni 3 498 862 kishini tashkil qildi. Kasallanganlar soni bo‘yicha yuqori beshlikda AQSh (33,1 million), Hindiston (27,3 million), Braziliya (16,2 million), Fransiya (5,6 million) va Turkiya (5,2 million) joylashdi.
Yaponiyada koronavirusning “olimpiyacha” shtammi paydo bo‘lishi mumkin
Tokiodagi Olimpiya o‘yinlariga butun dunyodan kelgan odamlarning ommaviy to‘planishi oqibatida COVID-19’ning “olimpiyacha” shtammi paydo bo‘lishi mumkin. Bu haqda Yaponiya Shifokorlar ittifoqi rahbari Naoto Ueyama aytib o‘tdi.“Turli joylarda mavjud bo‘lgan har xil virus shtammlari shu yerda, Tokioda yig‘iladi. Olimpiya o‘yinlaridan keyin virusning yangi shtammi yuzaga kelishi ehtimolini rad eta olmaymiz, — dedi Ueyama. — Agar shunday vaziyat paydo bo‘lsa, virusning yangi shtammi Tokiodagi Olimpiya o‘yinlari sharafiga nomlanishi ham mumkin, bu kelasi yuz yillik uchun ulkan fojia va tanqid obyekti bo‘lib xizmat qiladi”.
O‘z navbatida, Yaponiyada vaksinatsiyaga ko‘maklashayotgan Londondagi Qirollik kolleji Aholi salomatligi instituti direktori Kendzi Sibuya Olimpiya o‘yinlari chog‘ida kasallanish xavfini past baholadi. “Immuniteti past yoki qisman immunizatsiya qilingan odamlarda virus uzoq vaqt davomida saqlanib qolsa, mutatsiya yuz beradi. Shunday ekan, mening fikrimcha, Yaponiyadagi joriy vaziyat Tokio Olimpiya o‘yinlaridagidan ko‘ra ancha xavfliroq”, — dedi Sibuya.
Ayni paytda mamlakatda vaksinatsiya hozircha past sur’atlarda bormoqda, aholining 5 foizigina emlangan.
Olimpiada 2020-yil 24-iyuldan 9-avgustgacha bo‘lib o‘tishi kerak edi, ammo pandemiya tufayli musobaqalar bir yilga kechiktirildi. Endi u 2021-yil 23-iyuldan 8-avgustgacha o‘tkaziladi.
Mavzuga doir: Pandemiya tufayli Tokiodagi Olimpiada o‘yinlariga chet ellik tomoshabinlar kiritilmaydigan bo‘ldi
Rossiyada uy hayvonlarini COVID-19’ga qarshi emlash boshlandi
Rossiyaning ba’zi hududlarida uy hayvonlarini COVID-19’ga qarshi emlashga start berildi.“Kuni kecha Rossiya shaharlariga rossiyalik olimlar tomonidan hayvonlar orasida kasallik profilaktikasi maqsadida ishlab chiqilgan dunyoda yagona ‘Karnivak-Kov’ vaksinasining birinchi partiyalari yetkazib berildi”, — deya ma’lum qildi “Rosselxoznadzor”.
Vaksinatsiya ishlab chiquvchidan vaksina sotib olgan xususiy va davlat veterinariya klinikalarida olib borilmoqda.
Mavzuga doir: Rossiyada hayvonlar uchun koronavirus vaksinasini yanvar oyining oxiriga qadar tayyorlash rejalashtirilmoqda
Amerikalik ayol emlanganlar uchun lotereyada 1 million dollar yutib oldi
Amerikaning Ogayo shtatida yashovchi ayol koronavirusga qarshi emlanganlar uchun lotereyaning ilk g‘olibiga aylandi va 1 million dollar yutib oldi.Lotereyada 2,7 milliondan ortiq odam qatnashib, g‘olib tasodifiy raqamlar generatori yordamida aniqlangan. Englvud shahrida yashovchi maktab o‘quvchisi esa kollejdagi o‘qishini qoplab beradigan pul yutug‘ini qo‘lga kiritdi.
Kamida bitta doza bilan emlanganlar avtomatik tarzda lotereya ishtirokchilariga aylanadi. 23-iyunga qadar har hafta bir million dollardan pul yutug‘i o‘ynaladi. Mukofotlarni jami o‘n kishi: besh nafar voyaga yetgan shaxs va besh nafar o‘smir qo‘lga kiritadi.
Shuningdek:- AQSh prezidenti Jo Bayden Amerika razvedkasiga koronavirusning kelib chiqishi haqidagi ma’lumotlarni yig‘ish bo‘yicha harakatlarni ikki barobar kuchaytirishni buyurdi. Ushbu ma’lumotlar virus odamga kasallangan hayvondan yuqqani yoki laboratoriyadan sizib chiqqanini o‘z ichiga oladi. Olingan natijalar 90 kun ichida taqdim etilishi kerak.
- Germaniyalik olimlar AstraZeneca va tromblar o‘rtasidagi bog‘liqlikni aniqladi. Ularning versiyasiga ko‘ra, vaksinadagi koronavirusning S-oqsili hujayra suyuqligiga emas, yadroga yetkaziladi. U yerda u mutatsiyaga uchraydi, hujayra membranasi bilan bog‘lana olmaydi va oxir-oqibat, har 100 ming kishidan bittasida trombozga olib keladi.
Izoh (0)