Жонс Ҳопкинс университети маълумотларига кўра, дунёда коронавирусга чалинганлар сони 168 427 774 кишига етди. Вирусдан вафот этганлар сони 3 498 862 кишини ташкил қилди. Касалланганлар сони бўйича юқори бешликда АҚШ (33,1 миллион), Ҳиндистон (27,3 миллион), Бразилия (16,2 миллион), Франция (5,6 миллион) ва Туркия (5,2 миллион) жойлашди.
Японияда коронавируснинг «олимпияча» штамми пайдо бўлиши мумкин
Токиодаги Олимпия ўйинларига бутун дунёдан келган одамларнинг оммавий тўпланиши оқибатида COVID-19’нинг «олимпияча» штамми пайдо бўлиши мумкин. Бу ҳақда Япония Шифокорлар иттифоқи раҳбари Наото Уэяма айтиб ўтди.«Турли жойларда мавжуд бўлган ҳар хил вирус штаммлари шу ерда, Токиода йиғилади. Олимпия ўйинларидан кейин вируснинг янги штамми юзага келиши эҳтимолини рад эта олмаймиз, — деди Уэяма. — Агар шундай вазият пайдо бўлса, вируснинг янги штамми Токиодаги Олимпия ўйинлари шарафига номланиши ҳам мумкин, бу келаси юз йиллик учун улкан фожиа ва танқид объекти бўлиб хизмат қилади».
Ўз навбатида, Японияда вакцинацияга кўмаклашаётган Лондондаги Қироллик коллежи Аҳоли саломатлиги институти директори Кендзи Сибуя Олимпия ўйинлари чоғида касалланиш хавфини паст баҳолади. «Иммунитети паст ёки қисман иммунизация қилинган одамларда вирус узоқ вақт давомида сақланиб қолса, мутация юз беради. Шундай экан, менинг фикримча, Япониядаги жорий вазият Токио Олимпия ўйинларидагидан кўра анча хавфлироқ», — деди Сибуя.
Айни пайтда мамлакатда вакцинация ҳозирча паст суръатларда бормоқда, аҳолининг 5 фоизигина эмланган.
Олимпиада 2020 йил 24 июлдан 9 августгача бўлиб ўтиши керак эди, аммо пандемия туфайли мусобақалар бир йилга кечиктирилди. Энди у 2021 йил 23 июлдан 8 августгача ўтказилади.
Мавзуга доир: Пандемия туфайли Токиодаги Олимпиада ўйинларига чет эллик томошабинлар киритилмайдиган бўлди
Россияда уй ҳайвонларини COVID-19’га қарши эмлаш бошланди
Россиянинг баъзи ҳудудларида уй ҳайвонларини COVID-19’га қарши эмлашга старт берилди.«Куни кеча Россия шаҳарларига россиялик олимлар томонидан ҳайвонлар орасида касаллик профилактикаси мақсадида ишлаб чиқилган дунёда ягона ‘Карнивак-Ков’ вакцинасининг биринчи партиялари етказиб берилди», — дея маълум қилди «Росселхознадзор».
Вакцинация ишлаб чиқувчидан вакцина сотиб олган хусусий ва давлат ветеринария клиникаларида олиб борилмоқда.
Мавзуга доир: Россияда ҳайвонлар учун коронавирус вакцинасини январь ойининг охирига қадар тайёрлаш режалаштирилмоқда
Америкалик аёл эмланганлар учун лотереяда 1 миллион доллар ютиб олди
Американинг Огайо штатида яшовчи аёл коронавирусга қарши эмланганлар учун лотереянинг илк ғолибига айланди ва 1 миллион доллар ютиб олди.Лотереяда 2,7 миллиондан ортиқ одам қатнашиб, ғолиб тасодифий рақамлар генератори ёрдамида аниқланган. Энглвуд шаҳрида яшовчи мактаб ўқувчиси эса коллеждаги ўқишини қоплаб берадиган пул ютуғини қўлга киритди.
Камида битта доза билан эмланганлар автоматик тарзда лотерея иштирокчиларига айланади. 23 июнга қадар ҳар ҳафта бир миллион доллардан пул ютуғи ўйналади. Мукофотларни жами ўн киши: беш нафар вояга етган шахс ва беш нафар ўсмир қўлга киритади.
Шунингдек:- АҚШ президенти Жо Байден Америка разведкасига коронавируснинг келиб чиқиши ҳақидаги маълумотларни йиғиш бўйича ҳаракатларни икки баробар кучайтиришни буюрди. Ушбу маълумотлар вирус одамга касалланган ҳайвондан юққани ёки лабораториядан сизиб чиққанини ўз ичига олади. Олинган натижалар 90 кун ичида тақдим этилиши керак.
- Германиялик олимлар AstraZeneca ва тромблар ўртасидаги боғлиқликни аниқлади. Уларнинг версиясига кўра, вакцинадаги коронавируснинг S-оқсили ҳужайра суюқлигига эмас, ядрога етказилади. У ерда у мутацияга учрайди, ҳужайра мембранаси билан боғлана олмайди ва охир-оқибат, ҳар 100 минг кишидан биттасида тромбозга олиб келади.
Изоҳ (0)