Rossiya prezidenti Vladimir Putin Belarusdagi hamkasbi Aleksandr Lukashenkodan Amerika rahbari Jo Bayden bilan uning ruxsatisiz Belarusdagi vaziyatni muhokama qilgani uchun uzr so‘radi. Bu haqda Lukashenkoning o‘zi Belarus parlamenti a’zolari bilan uchrashuvda aytib o‘tdi.
“Putin vijdonan ish qildi. Menga qo‘ng‘iroq qilib, Belarusni ruxsatsiz muhokama qilgani uchun uzr so‘radi. Men unga Bayden bilan bu mavzuda gaplashgani uchun rahmat aytaman. Belarus haqida gaplashaversin, hech bo‘lmaganda, Bayden mamlakatimiz qayerda joylashganini bilib oladi”, — dedi Lukashenko.
Lukashenko o‘z nutqi davomida amerikalik hamkasbini Belarusdagi “vaziyatni o‘rganib chiqmaganlikda” aybladi. Lukashenko Rossiya va Qo‘shma Shtatlar rahbarlari keyingi uchrashuvda Ukraina va Belarus masalasini muhokama qilish niyatida ekaniga ishora qildi. Ammo uning fikriga ko‘ra, buni Minskda amalga oshirgan yaxshiroq. “Men ochiqchasiga taklif qilmoqchiman: agar ular Belarus muammolarini muhokama qilmoqchi bo‘lsa, bizning mamlakatga kelsin. Shveysariyada o‘tirib, Putinga Belarus muammolaridan dars berish kulgili”, — dedi Lukashenko.
Shuningdek, Kreml Putin va Lukashenkoning uchrashuvi 28-may kuni Sochida bo‘lib o‘tishini ma’lum qildi.
Rossiya prezidentining matbuot kotibi Dmitriy Peskov jurnalistlarga uchrashuv 28-may kuni bo‘lib o‘tishini tasdiqladi va muzokaralar davomida matbuot uchun hech qanday chiqish yoki bayonot rejalashtirilmaganini qo‘shimcha qildi.
Matbuot kotibining so‘zlariga ko‘ra, bo‘lajak uchrashuvda ikki mamlakat rahbarlari Belarus iqtisodiyotining ahvoli haqida gaplashadi. Rossiyadan yordam olish to‘g‘risida muhokama o‘tkazish respublika rahbarining bu masalani qanday ko‘tarishiga bog‘liq bo‘ladi.
Parlamentdagi chiqishida Lukashenko Putin bilan muzokaralar chog‘ida asosan iqtisodiyot mavzusi muhokama qilinishini aytdi, ammo aniq masalalarni keltirmadi.
Aprel oxirida Moskvada Putin va Lukashenko 4 soatlik muzokara o‘tkazgan edi. Ta’kidlanishicha, ular iqtisodiy masalalarni muhokama qilgan.
Mavzuga doir:
Izoh (0)