“Vilyarreal”ni chempion qilgan Unai Emeri Yevropa Ligasi tarixiga kirdi

Yevropa Ligasining final o‘yinida “Vilyarreal” “Manchester Yunayted”ni mag‘lub etib (1:1, penaltilar seriyasida 11:10), musobaqa g‘olibiga aylandi.

Ispan klubi bosh murabbiyi Unai Emeri uchun bu musobaqadagi to‘rtinchi g‘alaba bo‘ldi. Bungacha u Ispaniyaning boshqa bir klubi “Sevilya” bilan uch marta Yevropa Ligasida g‘alaba qozonishga muvaffaq bo‘lgandi — 2014, 2015 va 2016-yillarda.

Shu tariqa 49 yoshli mutaxassis Yevropa Ligasi / UEFA Kubogida to‘rt marta g‘alaba qozongan ilk murabbiy sifatida tarixga kirdi. U musobaqadagi g‘alabalar soni bo‘yicha rekordchi Jovanni Trapattoning ortda qoldirdi. Italiyalik murabbiy “Yuventus” (1977, 1993) va “Inter” (1991) bilan uch bor musobaqa g‘olibi bo‘lgan.

Emeri 2020-yildan beri “Vilyarreal”ni boshqarib kelmoqda.