“Manchester Yunayted” Unai Emeri boshqaruvidagi “sariq suv osti kemasi”ga qarshi. Yevropa Ligasi finali haqida

“Manchester Yunayted” Ispaniyaning yettinchi jamoasi “Vilyarreal”ga qarshi o‘ynaydi. Ispan klubini Yevropa Ligasini yutish “hadisini olgan” Unai Emeri boshqarib bormoqda. Jamoalar shu kunga qadar rasmiy o‘yinlarda to‘rt bor to‘qnash kelgan bo‘lsa, ularning barchasida 0:0 hisobidagi nursiz durang qayd etilgan. Biroq bu Gdanskdagi final zerikarli o‘tishini anglatmaydi, sababi yuqoridagi to‘rt o‘yin bundan 12—15 yillar oldin o‘tkazilgan. Inglizlarning kuchli hujum chizig‘i ispanlarning tartibli himoyasini yorib o‘tishga harakat qiladi.

Jamoalar bosib o‘tgan yo‘l

“Vilyarreal”ning Yevropa Ligasining ko‘rsatkichlari juda yuqori darajada: 12 g‘alaba va ikki durang! Unai Emeri jamoasi guruh bosqichidayoq o‘z ustunligini namoyish qila oldi. “Sariq suv osti kemasi” “Sivasspor” va “Qorabog‘”ni ikki o‘yinda ham mag‘lub etdi, “Makkabi Tel-Aviv” qarshi uchrashuvda bittadan g‘alaba va durang qayd etdi. To‘plangan 16 ochko orqali guruhda birinchi o‘rin bilan pley-offga yo‘llanma oldi. 1/16 finalda ispan klubi “Zalsburg”ni ikki o‘yinda ham taslim etdi (2:0, 2:1). Keyinchalik “Dinamo Kiyev” (2:0, 2:0) va “Dinamo Zagreb” (1:0, 2:1) ortda qoldirildi. Yarim finalda Emeri sobiq jamoasi “Arsenal”ni dog‘da qoldirdi (2:1, 0:0).

“Manchester Yunayted”ning yo‘li Chempionlar Ligasida boshlandi. Ingliz klubi guruh bosqichida “PSJ”, “Leypsig” va “Istanbul Bashakshehir” bilan bahs yuritdi va uchinchi o‘rinni olib, Yevropa Ligasiga tushdi. Yevropa Ligasida Ole-Gunnar Sulsher shogirdlari ispan va italyan jamoalariga qarshi o‘ynadi. Avvaliga “Real Sosyedad”ni to‘sig‘idan (4:0, 0:0) o‘tgan jamoa keyingi bosqichda “Milan”ni ortda qoldirdi (1:1, 1:0). Shundan keyin “Yunayted” “Granada”ni muammosiz yengdi (2:0, 2:0) va yarim finalda “Roma”ga imkon qoldirmadi (6:2, 2:3).

“Vilyarreal”

Yevropa Ligasida “Vilyarreal” himoyasini yorib o‘tish oson bo‘lmayapti

Musobaqada ispan klubining so‘nggi to‘rtta raqibi ikkita o‘yindan iborat to‘qnashuvda bittadan ortiq gol ura olmadi. “Vilyarreal” to‘rtta himoyachi bilan o‘ynab kelmoqda va ular tarkibida haqiqatda yaxshi futbolchilardan iborat. Raul Albiol ortiqcha ta’rifga muhtoj emas: himoyachi 35 yosh bo‘lishiga qaramay hamon yuqori saviya qayd etmoqda. Albiol bilan juftlikda ortda qolgan mavsum kashfiyotiga aylangan Pau Torres o‘ynaydi. 24 yoshli futbolchi transfer bozorida xaridorgir “mahsulot” bo‘lib turibdi. Unga da’vogarlar qatorida aynan “Manchester Yunayted” ham bor.

“Vilyarreal” qanoti ham kuchli o‘yinchilardan iborat, ikkisi ham klub tizimidan chiqqan. Mario Gaspar — jamoaning yetakchisi va sardori, Alfonso Pedrasa esa yozgi transfer oynasida jamoani tark etishi kutilayotgan yana bir iqtidor egasi. Xabarlarga ko‘ra, futbolchiga “Barselona”dan qiziqish bor, biroq hozirning uning uchun eng muhim Yevropa Ligasida g‘olib chiqish. Shunday ekan “Manchester Yunayted” hujumchilari bu o‘yinda raqib darvozasiga yo‘l topish uchun ancha-muncha ter to‘kishiga to‘g‘ri keladi.

Yevropa Ligasi g‘olibligi — Chempionlar Ligasi yo‘llanmasiga ega chiqish uchun so‘nggi imkon

“Vilyarreal” La Ligada yettinchi o‘rinni oldi va yangi tashkil etilgan Konferensiyalar Ligasiga yo‘llanma oldi. UEFAning yangi musobaqasi top-5 liga klublarini qiziqtirishi ehtimoli kam. Shu sabab Yevropa Ligasi finalida bor kuchni tashlashdan o‘zga chora yo‘q. Jamoa ortda qolgan mavsumdagi o‘yinidan kelib chiqiladigan bo‘lsa, kamida Yevropa Ligasiga munosib edi: “Vilyarreal” ko‘p o‘yinlarda yaxshi harakat qilib, ochko yo‘qotdi. Shuningdek, Emeri shogirdlari urilgan gollar borasida faqat “Barselona” va Madrid jamoalaridan ortda qoldi.

Yana Emerining Yevropa Ligasi bo‘yicha haqida mutaxassis ekanini unutmaslik lozim. Emeri “Sevilya” bilan uch bor ushbu sovringa ega chiqqan, “Arsenal” bilan esa finalga qadar yetib kelgandi.

“Manchester Yunayted”

“Manchester Yunayted” yaxshi formada emas

“Qizil iblislar” so‘nggi oltita o‘yinda bor-yo‘g‘i ikkita g‘alaba qayd etdi, shu bilan birga uchta o‘yinni boy berdi. Albatta, buni maqsad yo‘qligi va motivatsiya bilan bog‘lash mumkin: “Roma”ga qarshi mag‘lubiyat to‘rtta to‘p farqi bilan zafar quchilgan o‘yindan keyin bo‘ldi, “Lester”ga qarshi bahsda esa ikkinchi tarkib maydonga tushdi. Biroq prinsipial raqib bo‘lgan “Liverpul”ga qarshi o‘yin asosiy tarkib bilan boy berildi. “Fulhem”ga qarshi o‘yindagi 1:1 hisobini tushuntirish qiyin. Edinson Kavani maydon markazidan juda chiroyli gol urdi, biroq autsayder “Old Trafford”dan ochko olib qaytdi. Bunday xotirjamlik mavsumning so‘nggi o‘yinida ham pand berib qo‘yishi mumkin

“Manchester Yunayted” o‘yinga tayyorgarlik ko‘rish uchun yetarli vaqtga ega bo‘ldi — Premyer Liganing so‘nggi turida “Vulverhempton”ga qarshi o‘yinda zaxira o‘yinchilarini tashladi, zaxiradan tushgan o‘yinchilarini hatto “Manchester Yunayted”ning muxlislari ham tanishi mushkul masala. Qo‘shimcha hordiq kunlari ingliz klubining tiklanish jarayoniga ijobiy ta’sir o‘tkazishi mumkin, “Vilyarreal” esa shanba kuni o‘yin o‘tkazdi, biroq bu hal qiluvchi ahamiyatga ega deb bo‘lmaydi.

Harri Maguayrning ishtiroki so‘roq ostida

“Manchester Yunayted” sardori jamoaning so‘nggi o‘yinini may oyi boshida o‘tkazgandi. “Aston Villa”ga qarshi o‘yinning 78-daqiqasida futbolchi jarohat tufayli zaxiraga olingandi va shundan beri maydonga tushgani yo‘q. Harri Gdanskka jamoa bilan birga kelgan. Sulsher jurnalistlarning futbolchi holati bilan bog‘liq savoliga to‘g‘ridan to‘g‘ri javob berishdan qochdi va yakuniy qaror mashg‘ulotlardan keyin chiqarilishini ma’lum qildi.

Agar Angliya terma jamoasi vakili o‘yinda qatnasha olmaydigan bo‘lsa, uning o‘rnini katta ehtimol bilan Aksel Tuanzebe egallaydi. 23 yoshli futbolchi mavsum davomida u qadar ko‘p o‘yin amaliyotga ega bo‘lmadi, biroq uning maydonga tushishi “billur oyoq” Erik Bayinikidan ko‘ra haqiqatga yaqinroq.