Malida harbiy ma’muriyatning buyrug‘iga binoan quruqlik va havo chegaralari yopilib, komendantlik soati o‘rnatildi. Bu haqda Seneweb yangiliklar portaliga tayanib, “TASS” xabar berdi.
Xabarga ko‘ra, komendantlik soati butun mamlakat bo‘ylab soat 20:00 dan 06:00 gacha amal qiladi. Ushbu choralar Malida 24-may kuni harbiylar mamlakatning muvaqqat prezidenti Ba Ndao va bosh vazir Moktar Uanni hibsga olib, ularni mamlakat poytaxti Bamako yaqinidagi harbiy bazaga joylashtirgandan so‘ng boshlangan siyosiy inqiroz bilan bog‘liq holda qabul qilindi. Hibsga olishdan bir kun o‘tib, vitse-prezident Assimi Goyta prezident va bosh vazir barcha vakolatlardan mahrum qilingani aytdi. 26-may kuni ular iste’fo berdi. Iste’fo bo‘yicha Ndao va Uandan hali rasmiy bayonot olinmagan.
Seneweb ma’lum qilishicha, 26-may kuni Bamakoda Goyta boshchiligidagi harbiy guruh va Maliga tashrif buyurgan G‘arbiy Afrika davlatlari Iqtisodiy Hamjamiyat (ECOWAS) vositachilari delegatsiyasi o‘rtasida maslahatlashuvlar bo‘lib o‘tdi. ECOWAS Mali harbiylariga Ndao va Uanni ozod qilish uchun tezkor choralar ko‘rilmasa, keng ko‘lamli sanksiyalar bilan tahdid qildi
O‘z navbatida Goyta yaqin ikki kun ichida yangi hukumat tayinlash niyatida ekanini aytdi. Shu bilan birga, yangi muvaqqat prezident saylangunga qadar Malidagi oliy hokimiyat harbiy kengash qo‘lida bo‘ladi. Maslahatlashuvlar davom etmoqda va tomonlar hali o‘z pozitsiyalarini o‘zgartirishi mumkin.
AFP agentligining Mali harbiylariga tayanib xabar berishicha, prezident va bosh vazir iste’foga chiqqanidan so‘ng ozod etildi. “Bosh vazir va muvaqqat prezident 27-may tuni soat 1:30 (Toshkent vaqti bilan 00:30) da ozod qilindi. Biz so‘zimizning ustidan chiqdik”, — deya harbiy hokimiyat vakilining bayonotini keltirdi AFP.
Ma’lumot uchun Malidagi ECOWAS delegatsiyasiga Nigeriyaning sobiq prezidenti Gudlak Jonatan rahbarlik qilmoqda. U 2020-yil avgust oyidagi harbiy to‘ntarishdan so‘ng Maliga uch marta tashrif buyurgan ECOWAS vositachilar delegatsiyasini boshqarib, Goyta va Mali harbiylari bilan muzokaralarda qatnashgan edi. O‘shanda ECOWAS tomonidan keng qamrovli sanksiyalar tahdidi ostida harbiylar fuqarolik boshchiligidagi hukumat tuzishga, shuningdek, Malining muvaqqat prezidentini saylashga kelishib olgan.
21-sentabrda harbiylar tomonidan tashkil qilingan saylovlar kollegiyasi sobiq mudofaa vaziri va iste’fodagi polkovnik Ba Ndaoni Malining keyingi 18 oy davomidagi muvaqqat prezidenti, Assimi Goytani esa vitse-prezident etib tayinlagan edi. Ba Ndao o‘zining farmoni bilan tashqi ishlar vazirligining sobiq rahbari Moktar Uanni 27-sentabr kuni Mali muvaqqat hukumati rahbari lavozimiga tayinlagan.
Harbiylar Malida o‘tish davri davom etishini va hokimiyatni qo‘lga kiritgan kunidan 18 oy o‘tgach bo‘lib o‘tadigan prezident va parlament saylovlari orqali mamlakat demokratik boshqaruvga qaytishini e’lon qilgan.
Izoh (0)