Armaniston Qurolli kuchlarining razvedka-diversiya guruhi Armaniston—Ozarbayjon chegarasini kesib o‘tishga uringan olti nafar armanistonlik harbiyni asirga oldi. Bu haqda Ozarbayjon Mudofaa vazirligi ma’lumotiga tayanib, “RBK” xabar berdi.
“27-may kuni, taxminan, soat 03:00 da, Armaniston Qurolli kuchlarining razvedka-diversiya guruhi Armaniston—Ozarbayjon davlat chegarasini Kelbajar tumani Yuxari Ayrim aholi punktiga qarab kesib o‘tishga urindi”, — deyiladi xabarda.
Vazirlik, shuningdek, qo‘lga olingan Armaniston harbiylari Ozarbayjon armiyasi pozitsiyalariga olib boruvchi ta’minot yo‘llarini minalashga uringanini ta’kidladi. Bundan tashqari, chegarada Armanistonning harbiy texnikasi, xususan, tanklari to‘plangani aytilmoqda.
Noyabr oyida imzolangan uch tomonlama shartnomaga binoan Kelbajar viloyati Ozarbayjonga berilgan edi. Respublika 25-noyabr kuni rasman mintaqa ustidan nazorat o‘rnatgan.
Ozarbayjon Tashqi ishlar vazirligi ushbu voqeani izohlar ekan, Armaniston bir muncha vaqtdan beri chegaraoldi mintaqalardagi tanglikni atay kuchaytirish siyosatini olib borayotganini aytdi. “Armaniston Qurolli kuchlari razvedka guruhining Ozarbayjon hududiga kirib borishi, bu hududni minalashtirish va diversiyaga urinishlari terrorchilik hisoblanadi”, — deyiladi vazirlik bayonotida.
Armaniston Mudofaa vazirligi olti nafar harbiy xizmatchi qo‘lga olinganini tasdiqladi, ammo vazirlik voqea Armaniston hududidagi Gegarkunik viloyati chegara zonasida muhandislik ishlari olib borilayotgan paytda yuz berganini bildirdi.
“27-may kuni erta tongda Armaniston Qurolli kuchlarining olti nafar harbiy xizmatchisi respublikaning Gegarkunik viloyati chegara zonasida muhandislik ishlarini olib borayotgan payt Ozarbayjon Qurolli kuchlari ularni qurshovga olib, asirga olgan. Asirdagi harbiy xizmatchilarni qaytarish uchun zarur choralar ko‘rilmoqda”, — deyiladi vazirlik xabarida.
Armaniston Tashqi ishlar vazirligi o‘z navbatida Ozarbayjonning harakatlarini provokatsion deb atab, ular vaziyatni yanada keskinlashtirishga qaratilganini aytdi. Vazirlik “bu mintaqaviy tinchlik va barqarorlikka jiddiy putur yetkazishi mumkin” deb ogohlantirdi.
Armaniston bosh vaziri vazifasini bajaruvchi Nikol Pashinyanning izoh berishicha, hibsga olingan olti nafar harbiy xizmatchi Ozarbayjon bilan chegarani tartibga solish va ogohlantirish belgilarini o‘rnatgan holda minalashtirish ishlarini olib borayotgan edi.
Pashinyan bu ishda buzg‘unchilik maqsadi bo‘lmaganini ta’kidladi. Shuningdek, u Armaniston harbiylarining qo‘lga olinishini o‘g‘rilik deb atadi. “Bunday hodisalar yuz berib turadi, chunki ayrimlar bizni o‘z hududimizda Ozarbayjon harbiylari borligiga ko‘nikishimizni istaydi, ammo bunday bo‘lmaydi”.
Uning ta’kidlashicha, Ozarbayjon harbiylari zudlik bilan Armaniston hududini tark etishi kerak.
Izoh (0)