Toshkent shahar hokimi Jahongir Ortiqxo‘jayev poytaxtdagi reklama bannerlari demontaj qilish to‘g‘risidagi savolni javobsiz qoldirdi, deb xabar bermoqda “Gazeta.uz”.
Hokim 25-may, seshanba kuni “Toshkent besh tashabbus harakati” yoshlar festivali doirasida yoshlar bilan uchrashdi. Uchrashuv boshlanishidan oldin jurnalistlar bu brifing yoki matbuot anjumani emasligi haqida ogohlantirilib, yoshlarga o‘z fikrini bayon etish va savol berish imkoniyatini berish iltimos qilingan.
Jahongir Ortiqxo‘jayev, shuningdek, uni soat 17:00 dagi yig‘ilishga chaqirib qolishlari mumkinligi haqida ham ogohlantirgan. U to‘yni to‘ydek qilib bergan va festivalni yoritgan jurnalist va blogerlarga minnatdorchilik bildirgan, festivaldan keyin “endi qancha tanqid qilishsa ham, rozi ekanligini” qo‘shimcha qilgan.
50 daqiqa davom etgan yoshlar bilan uchrashuvdan so‘ng hokim majlisga borishi uchun xizmat mashinasi tomon yurgan. Unga jurnalistlar hamrohlik qilib, yo‘l-yo‘lakay savollar bergan.
“Poytaxt” radiosi bilan suhbatda hokim festival haqidagi savollarga javob bergan. Undan qaysi tadbirlarga borgani va unga nima yoqqanini so‘rashgan.
Shundan so‘ng “Qalampir.uz” jurnalisti Jahongir Ortiqxo‘jayevni ko‘pchilik yaxshi tadbirkor sifatida bilishini ta’kidlab, u hozirda tadbirkorlarni qanchalik qo‘llab-quvvatlashini so‘ragan. “Barcha turdagi tadbirkorlarni qo‘llab-quvvatlayman”, — deb javob bergan u.
Ammo hokimga reklama konstruksiyalari “birma-bir qarorsiz” buzib tashlanayotgani haqida savol berilganida u qadamini tezlatgan.
Eslatib o‘tamiz, Toshkent shahrida 8-apreldan boshlab reklama konstruksiyalarini ommaviy buzib tashlash ishlari amalga oshirilmoqda. Tashqi reklama obyektlarining egalari konstruksiyalar qonun bo‘yicha o‘rnatilgani, “snos” bo‘yicha ko‘rsatma “yuqoridan” bo‘lganini ma’lum qilgan. Tadbirkorlar hozirga qadar 700 dan ortiq bannerlarni olib tashlagan hukumatning harakatini noqonuniy deb aytmoqda, chunki bannerlar sud qarorisiz buzib tashlanmoqda.
Keyinchalik reklama sohasidagi tadbirkorlar ushbu vaziyatni hal etishga chaqiruvchi bir nechta reklama bannerlari o‘rnatish orqali reklama konstruksiyalarining noqonuniy buzilishini to‘xtatishni so‘rab, Prezident Shavkat Mirziyoyevga murojaat yo‘lladi.
Izoh (0)