Monopoliyaga qarshi kurashish qo‘mitasi Toshkentdagi reklama bannerlarining buzilayotganiga munosabat bildirdi
Toshkent shahrida 8-apreldan boshlab reklama konstruksiyalarini ommaviy buzib tashlash ishlari amalga oshirilmoqda. Tashqi reklama obyektlarining egalari konstruksiyalar qonun bo‘yicha o‘rnatilgani, “snos” bo‘yicha ko‘rsatma “yuqoridan” bo‘lganini ma’lum qilgan. Tadbirkorlar hozirga qadar 300 dan ortiq bannerlarni olib tashlagan hukumatning harakatini noqonuniy deb atab, bu borada tushuntirish talab qilmoqda. Biznes-ombudsman Toshkentdagi reklama bannerlarining buzib yuborilishi qonuniyligini o‘rganmoqda.
Monopoliyaga qarshi kurashish qo‘mitasi mazkur vaziyatga munosabat bildirib, Vazirlar Mahkamasining “Tashqi reklama bozorini tartibga solish to‘g‘risida” 2020-yil 20-fevraldagi 104-sonli qarori bilan tashqi reklama obyektlarini (konstruksiyalarini) qurish, o‘rnatish, ularga yer ajratish, to‘lovlar miqdorini aniqlash, texnik jihatdan tartibga solish va boshqa masalalar yuzasidan yagona amal qiluvchi mexanizmlar joriy qilinganini ta’kidladi.
Qo‘mitaning ma’lum qilishicha, tumanlarda ishchi guruhlar tashkil etilib, barcha turdagi tashqi reklama obyektlari (konstruksiyalar) xatlovdan o‘tkazilgan.
Natijalari bo‘yicha taqdim etilgan ma’lumotlarga ko‘ra, respublika hududlarida joylashtirilgan jami 12 318 ta tashqi reklama obyektining (konstruksiyasi)ning 7108 tasi (57,7 foizi) qaror talablariga muvofiq emasligi aniqlangan. Shundan, Toshkent shahrida joylashgan 6630 ta konstruksiyaning 3207 tasi yoki 50 foizga yaqinida kamchilik aniqlangan.
Shundan, Toshkent shahrida joylashgan va qaror talablariga nomuvofiq deb topilgan 3207 ta tashqi reklama obyektining (konstruksiyasining) 1459 tasi yo‘l qatnov qismida joylashganligi, 124 tasida oraliq masofaga rioya qilmaganligi, 1104 tasining egasi aniqlanmagan hamda 520 tasida boshqa kamchiliklar (avtomobil yo‘llarining ajratuvchi bo‘lagida, xususan, yo‘lning yonma-yon joylashgan qatnov qismlarini ajratuvchi, transport vositalari harakatlanishi yoki to‘xtashi uchun mo‘ljallanmagan, yo‘l sathidan baland va (yoki) yotiq chizig‘i bilan belgilangan qismida hamda trotuar va piyodalar yo‘lkalarida, xavfsizlik orolchalarida joylashgan va boshqalar) aniqlangan.
Qo‘mitaning ta’kidlashicha, Toshkentning markaziy ko‘chalari bo‘yidagi reklama konstruksiyalari raqamlisiga almashtirilishi kerak. Dastlab, bu birinchi darajali markaziy ko‘chalarda (2020-yil 31-dekabrga qadar), shundan so‘ng ikkinchi darajali ko‘chalarda (2021-yil 31-dekabrgacha) amalga oshiriladi.
Qarorga ko‘ra, tashqi reklama obyektlarini (konstruksiyalarini) yuqori texnologiyali qurilmalarga o‘zgartirish ishlari belgilangan muddatlarda bajarilmagan taqdirda, bunday qurilmalar ularning egalari tomonidan o‘z kuchi bilan olib tashlanadi (demontaj qilinadi) va yer maydoni tartibga keltiriladi, aks holda qurilmalar sud tartibida tegishli hokimlik tomonidan demontaj qilinadi va barcha xarajatlar reklama obyektlari (konstruksiyalari) egalaridan undiriladi.
Monopoliyaga qarshi kurashish qo‘mitasi bugungi kunda Toshkent shahrida o‘rnatilgan tashqi reklama obyektlarini (konstruksiyalarini) tartibga keltirish bo‘yicha amalga oshirilayotgan chora-tadbirlarda qatnashayotgan barcha ishtirokchilarni qat’iy ravishda “Reklama to‘g‘risida”gi qonun va Vazirlar Mahkamasining “Tashqi reklama bozorini tartibga solish to‘g‘risida”gi qarori talablari asosida o‘tkazilishi lozimligini ma’lum qilgan.
Humo Media direktori Saveliy Sokolovning “Gazeta.uz”ga ma’lum qilishicha, davlat idoralari birinchi va ikkinchi darajali ko‘chalar ro‘yxatini tuzgan, biroq u bundan rasman xabardor etilmagan.
“Ya’ni biz qaysi ko‘chalar birinchi va ikkinchi darajali ekanligini bilmaymiz. Shu sababli ekranlarni qayerga qo‘yish kerakligi tushinarsiz. Mutlaqo. Biz bu faylni Telegram orqali oldik, ammo uni oldik deb hisoblamayman. Va u yerda barcha konstruksiyalar olib tashlangan Mirobod ko‘chasi yo‘q. Ya’ni ular bir-biriga zid keladi.
Tadbirkorning ta’kidlashicha, buzib tashlash ishlariga faqat sud qarori orqali ruxsat berilishi borasidagi “hukumat qarorining asosiy bandini barcha ko‘zdan qochirmoqda”.
“Monopoliyaga qarshi kurashish qo‘mitasi shikoyatlaring bo‘lsa, sudga boringlar deyapti. Axir bu huquqiy tartibsizlikku. Konstruksiyalarimizga kelgan militsiyaga “qonunbuzarlarni to‘xtating”, “mulkka shikast yetkazmoq”da deyapmiz. Ular esa “sudga boring” demoqda. Qarorda esa buzish ishlariga faqat sud qarori orqali ruxsat berilgan, qaror esa yo‘q. Qonunsizlik”, — deydi u.
