Korrupsiyaga qarshi kurashish agentligi direktori Akmal Burhonov 26-may kuni AOKAda bo‘lib o‘tgan anjumanda “Trest-12” qurilish kompaniyasi hamda qurilish vaziri Botir Zokirov o‘rtasidagi manfaatlar to‘qnashuviga oid vaziyatni tasdiqladi, deb yozadi “Gazeta.uz”.
“Albatta, biz ‘Trest-12’ bo‘yicha o‘rganishlar o‘tkazyapmiz. Dastlabki o‘rganishlarimiz bo‘yicha ko‘rdikki, adashmasam, 5 trillion so‘mga yaqin (Markaziy bankning 27-maydagi kursiga ko‘ra, 471 million dollar atrofida) to‘g‘ridan to‘g‘ri shartnomalar bilan qurilish ishlari amalga oshirilgan. Bu yerda ham, afsuski, aksariyat manfaatlar to‘qnashuviga yo‘l qo‘yilgani va (qonunchilikda manfaatlar to‘qnashuvi uchun — tahr.) javobgarlik masalasining yo‘qligi turibdi”, — dedi u.
“Umuman, biz o‘rganganimizda nafaqat ‘Trest-12’, balki 2020-yil davomidagi davlat xaridlarining 48 foizi to‘g‘ridan to‘g‘ri shartnomalar orqali amalga oshirilgan. Ya’ni u yoki bu alohida farmoyish yoki qaror asosida”, — dedi Akmal Burhonov.
U, shuningdek, davlat xaridlarida manfaatlar to‘qnashuviga oid muammolarni bartaraf etish uchun qanday choralar ko‘rilayotganiga ham to‘xtalib o‘tgan.
“Shuning uchun bu bo‘yicha ham taklif tayyorlayapmiz. Birinchi o‘rinda, davlat xaridlaridagi manfaatlar to‘qnashuvi. Ikkinchisi, turli xil farmoyishlar va bayonnomalar bilan davlat xaridlarini amalga oshirish va qurilish obyektlarini tendersiz berishni taqiqlashga oid qonunchilikka o‘zgartirish kiritish bo‘yicha taklif tayyorlayapmiz”, — deydi agentlik rahbari.
Uning qo‘shimcha qilishicha, “Trest-12” qo‘lga kiritgan davlat xaridlariga Qurilish vazirligining aloqasi bor.
“‘Trest-12’ masalasi hali o‘rganish jarayonida, natijasi bo‘yicha agar qonun buzilish holatlari bo‘ladigan bo‘lsa, ma’lumotlarni taqdim etamiz. Aytganimdek, bu yerda katta summa. Manfaatlar to‘qnashuvi bor, buni yashirib bo‘lmaydi. Chunki Qurilish vazirligining aloqasi bor. Lekin bu yerda jinoyat alomatlari haqida gap ketyapti”, — deydi Akmal Burhonov.
Eslatib o‘tamiz, 13-aprel kuni aksiyadorlari orasida qurilish vaziri Botir Zokirovning o‘g‘li va rafiqasi bo‘lgan “Trest-12” kompaniyasi tendersiz qator loyihalarni amalga oshirib kelayotgani to‘g‘risida xabar berilgandi. Kompaniya aksiyadorlari ro‘yxatida 2019-yil iyul oyida vazirning o‘zi ham bo‘lgan. O‘shanda u qurilish vazirining birinchi o‘rinbosari, 1996−2011-yillarda esa — “Trest-12” boshqaruv kengashi raisi sifatida ishlagan.
Vazir Toshkentning Sharof Rashidov ko‘chasidagi (Mustaqillik maydoni yonida) ma’muriy bino rekonstruksiyasiga oid davlat xaridiga o‘zi va oila a’zolarining aloqasi yo‘qligini aytgan edi. “Bir narsani tushunishlaring kerak, 51 foiz davlat ulushi bo‘lgandan keyin menga uning sovug‘i ham, issig‘i ham yo‘q”, — degandi vazir.
Keyinroq mazkur kompaniya hukumat buyrug‘i bilan Qonunchilik palatasi binosining tashqi ko‘rinishini rekonstruksiya qilish va binoni joriy ta’mirlash uchun 16,54 milliard so‘mlik loyihani qo‘lga kiritgani ma’lum bo‘lgandi.
Mavzuga doir:
- Korrupsiyaga qarshi kurashish agentligi Buxoro tibbiyot instituti tomonidan davlat xaridlari borasida qonun buzilishiga yo‘l qo‘yilganini tasdiqladi
- Termizda quriladigan 20 mln dollarlik xalqaro savdo markazining tenderida aka-ukaga tegishli kompaniyalar qatnashgani ma’lum bo‘ldi
- Korrupsiyaga qarshi kurashish agentligiga sud va prokuratura qarorlaridan norozi aholi ko‘proq murojaat qilayotgani ma’lum bo‘ldi
Izoh (0)