YuNISEF va UNFPA Qoraqalpog‘istondagi tug‘ruqxonalarga 1 million dollarlik tibbiy asbob-uskunalarni sovg‘a qildi, deb xabar berdi “Gazeta.uz” YuNISEFning O‘zbekistondagi vakolatxonasi matbuot xizmatiga tayanib.
Qo‘ng‘irot va Beruniy tumanlari hamda Nukus shahridagi perinatal markazlarga neonatal intensiv terapiya bo‘limlari va operatsiya xonalari uchun 300 ta uskunalar topshirildi. Bularga jarrohlik asboblari, elektrokardiografiya asboblari, ultratovush diagnostikasi asboblari va havo bosimi moslamalari kiradi.
“Endi Qoraqalpog‘iston aholisining 50 foizidan ko‘prog‘i ushbu tug‘ruqxonalarda ixtisoslashgan perinatal yordamidan foydalanish imkoniyatiga ega bo‘ladi”, – deydi YuNISEFning O‘zbekistondagi vakolatxonasi rahbari Munir Mamadzoda.
Tug‘ruqxonalarga yordam O‘zbekiston va Qoraqalpog‘iston sog‘liqni saqlash vazirliklari, YuNISEF va UNFPA tomonidan amalga oshirilayotgan “Aholining ijtimoiy himoyaga muhtoj onalari va yangi tug‘ilgan chaqaloqlariga perinatal yordam sifatini oshirish” loyihasi doirasida amalga oshiriladi.
Loyiha boshlangandan buyon Qoraqalpog‘istondagi barcha onalar va yangi tug‘ilgan chaqaloqlarning 21 foizi – 12 mingdan ziyod onalar va 12 ming yangi tug‘ilgan chaqaloqlar ushbu perinatal markazlarda infratuzilma va sifatli parvarishlardan foydalandi. YuNISEFning press-reliziga ko‘ra, erta tug‘ilgan chaqaloqlarning o‘limini sezilarli darajada kamaytirishga uchta tibbiyot muassasalarida o‘rtacha 22 foizga erishildi.
Loyiha 2019-yil avgust oyidan buyon BMTning Inson xavfsizligi bo‘yicha ko‘p sherikli Trast jamg‘armasining 1,6 million dollar miqdoridagi moliyaviy ko‘magi bilan Orolbo‘yi mintaqasida amalga oshirilmoqda. Jamg‘arma O‘zbekiston, Norvegiya, Finlyandiya, Janubiy Koreya va Yevropa Ittifoqi hukumatlari tomonidan qo‘llab-quvvatlanadi.
Bundan avval BMT Bosh Assambleyasi Orolbo‘yi mintaqasi bo‘yicha maxsus rezolyutsiya qabul qilgani, AQShdan Orolbo‘yi aholisi uchun gumanitar yordam yuborilgani hamda Orolbo‘yi aholisiga biznes ko‘nikmalari o‘rgatilishi haqida xabar berilgandi.
Izoh (0)