Surxondaryo viloyatining Sho‘rchi tumanida Damas va “KamAZ” ishtirokida YTH yuz berdi. Oqibatda ikki kishi halok bo‘ldi, yana ikki kishi og‘ir tan jarohatlari oldi. Bu haqda viloyat YHXB xabar berdi.
Ma’lum qilinishicha, voqea 24-mayga o‘tar kechasi, M41 Bishkek—Dushanbe—Termiz xalqaro avtomobil yo‘lining Sho‘rchi tumani “Guliston” mahallasi hududidan o‘tuvchi 1501-kilometrida yuz bergan. Denov—Sho‘rchi yo‘nalishida harakatlanib kelayotgan “KamAZ” yuk mashinasi yo‘lning qarama-qarshi tomoniga o‘tib ketgan va o‘z yo‘nalishida harakatlanib kelayotgan Damas bilan to‘qnashgan.
Oqibatda Damas haydovchisi va uning yonida bo‘lgan yo‘lovchi og‘ir tan jarohatlari olib, voqea joyida halok bo‘lgan. Shuningdek, Damas’da yo‘lovchi sifatida ketayotgan 27 yoshli yigit va 2-sinf o‘quvchisi bo‘lgan 8 yoshli qiz og‘ir tan jarohatlari bilan Sho‘rchi tuman tibbiyot birlashmasining jonlantirish bo‘limiga yotqizilgan.
YTH oqibatida “KamAZ” yo‘l chetidagi zovurga ag‘darilib ketgan.
Surishtiruvlarda “KamAZ” haydovchisi yetarli malakaga ega bo‘lmagani, haydovchilik guvohnomasini olganiga endi bir yil bo‘lgani, yuk mashinalarini boshqarish huquqini beruvchi guvohnomani bir yil avval olgani aniqlangan.
Avvalroq Angrenda 8 ta transport vositasi — yuk mashinasi, 3 ta Lacetti, 2 ta Nexia-3, Cobalt va Matiz ishtirok etgan yirik YTH sodir bo‘lgani haqida xabar berilgan edi. Hodisa oqibatida jami 7 nafar shaxs vafot etgan, 14 nafar shaxs olgan tan jarohatlari bilan shifoxonaga yotqizilgan. Holat yuzasidan jinoyat ishi qo‘zg‘atilgan.
Izoh (0)