Katta Farg‘ona kanalining cho‘milish mumkin bo‘lmagan hududida 15 yoshli o‘smir cho‘kib ketdi. Uning jasadi 16-may kuni kanal tubidan olib chiqildi. Bu haqda “Sevimli” telekanalining “Zamon” informatsion dasturida ma’lum qilindi.
Qayd etilishicha, Farg‘ona viloyati Qo‘qon shahrining Alisher Navoiy mavzesidan kelgan 3 nafar o‘smir 15-may kuni Katta Farg‘ona kanalining O‘zbekiston tumanidan oqib o‘tgan qismida cho‘milmoqchi bo‘lgan. Cho‘milayotgan bolalardan biri kanalning narigi qirg‘og‘iga o‘tayotgan paytda bexosdan cho‘kib ketgan.
Tez orada voqea joyiga tuman IIBdan xabar topgan O‘zbekiston tumani Favqulodda vaziyatlar bo‘limi qutqaruv-qidiruv xodimlari yetib kelgan.
Dastlab, 15-may kuni tuman ichki ishlar bo‘limi xodimlari bilan hamkorlikda qidiruv ishlari olib borilgan. 16-may kuni Farg‘ona viloyati Favqulodda vaziyatlar boshqarmasi maxsus vazifalarni bajaruvchi mintaqaviy qidiruv-qutqaruv maxsus otryadi suvda qutqaruv guruhi tomonidan qidiruv ishlari olib borilgan.
Ko‘rilgan chora-tadbirlar natijasida Qo‘qon shahrida istiqomat qiluvchi 2006-yilda tug‘ilgan, 15 yashar fuqaroning jonsiz tanasi g‘avvos qutqaruvchilar tomonidan kanalning tubidan olib chiqilgan.
Eslatib o‘tamiz, 2021-yilning 5-martida 13 yoshli sportchi yigit ushbu kanalda cho‘kib ketgandi. Sportchining jasadi 8-mart kuni ikki metr chuqurlikdan topilgandi.
Mavzuga doir:
Izoh (0)