Давлат хавфсизлик хизмати (ДХХ)нинг Тошкентдаги Сайилгоҳ кўчасида жойлашган собиқ марказий биноси ҳудуди хусусий секторга сотилиши ҳақида хабар берилган эди. Уни сотиб олиш бўйича 3 та таклиф келиб тушди. Бу ҳақда 21 май куни Давлат активларини бошқариш агентлигида бўлиб ўтган Давлат тендер комиссиясининг навбатдаги йиғилишида маълум қилинди.
Оммавий савдоларга чиқарилган йирик активларнинг 6 таси бўйича жами 16 та таклиф келиб тушган. «Малика» савдо мажмуаси, «Ичан қалъа» меҳмонхонаси ва «Қизил сув спорт соғломлаштириш» МЧЖ бўйича 2 та, «Пойтахт бизнес мажмуаси» МЧЖ мулкий мажмуаси бўйича 3 та, Газеталар ишлаб чиқариш мажмуаси биноси бўйича 4 та талабгордан сотиб олиш бўйича таклифлар келиб тушган.
Қайд этилишича, энди ишчи орган томонидан 5 иш куни мобайнида талабгорлардан келиб тушган таклифларнинг давлат активлари бўйича савдо шартларига мослиги, ундан келгусида фойдаланиш йўналишларига қўйилган талабга таклиф этилган бизнес концепция лойиҳасининг мақбул ёки мақбул эмаслиги ўрганилади.
Ишчи орган ўз ҳисоботини тайёрлаб, Давлат тендер комиссиясига кўриб чиқиш учун тақдим этади ва иккинчи босқичга ўтган ёки ўтмагани тўғрисида маълумотлар эълон қилинади. Ҳар бир талабгорга индивидуал хабарлар юборилади.
Шу билан бирга Давлат тендер комиссиясининг биринчи босқич якунлари бўйича қарори Давлат активларини бошқариш агентлиги агентлиги томонидан эълон қилинади.
Эсатиб ўтамиз, Давлат активларини бошқариш агентлиги 30 март куни Тошкент шаҳри ва вилоятида бир неча объектлар сотувга қўйилгани ҳақида маълум қилганди. Улар орасида Ўзбекистон Биринчи Президенти Ислом Каримовнинг тўнғич қизи Гулнора Каримовага тегишли бўлган «Сижжак» дам олиш оромгоҳи ҳам бор.
Изоҳ (0)