Samarqand viloyati Bulung‘ur tumanida joylashgan “Yuqori nuqta” YPX maskanida to‘xtatilgan Nexia avtomobili ichida hech qanday hujjatlari bo‘lmagan go‘sht mahsulotlari borligi aniqlandi. Bu haqda “Postda” gazetasi xabar berdi.
Qashqadaryo—Toshkent yo‘nalishida harakatlanib kelayotgan M.F. ismli fuqaro o‘zining mashinasi yukxonasida va salonda veterinariya-sanitariya talablariga javob bermaydigan 141 kilogramm og‘irlikdagi go‘sht mahsulotlarini olib ketayotgan bo‘lgan.
Shuningdek, ushbu avtomashina bilan birga harakatlanib kelayotgan, N.B. boshqaruvidagi Nexia rusumli avtotransport vositasi ham tekshirilganida, uning ham yukxonasi va saloni ichida veterinariya-sanitariya talablariga javob bermaydigan, kelib chiqishi noma’lum bo‘lgan 46 kilogramm og‘irlikdagi go‘sht mahsuloti borligi aniqlangan.
Ekspertiza tekshiruv natijasiga ko‘ra, ushbu go‘sht mahsulotlari iste’molga yaroqsizligi tufayli tegishli tartibda yo‘q qilingan.
Avvalroq Qashqadaryoda iste’molga yaroqsiz 800 kg go‘shtni mashina saloni va yukxonasida olib ketayotgan shaxslar aniqlangani, Farg‘onada mushuk go‘shtini sotganlar ushlangani to‘g‘risidagi xabarlar rad etilgani hamda Navoiyda sanitariya qoidalarini buzgan holda 15 bosh qo‘y go‘shtini Toshkentga olib kelayotgan Cobalt haydovchisi jarimaga tortilgani haqida xabar qilingandi.
Izoh (0)