“Odamlarning ma’naviyati va oiladagi tarbiyasiga bog‘liq” — Mahalla va oilani qo‘llab-quvvatlash vazirining birinchi o‘rinbosari O‘zbekistonda xotin-qizlarning zo‘ravonlikka uchrash sabablari haqida

Mahalla va oilani qo‘llab-quvvatlash vazirining birinchi o‘rinbosari Gulnora Ma’rufova 21-may, juma kuni start olgan “Toshkent 5 tashabbus harakati” yoshlar festivalida OAV vakillariga bergan intervyusida ayollarga nisbatan tazyiq va zo‘ravonlik holatlarining ortib borayotgani hamda uning sabablari haqida so‘z yuritdi. Bu haqda “Daryo” muxbiri Mirolim Isajonov xabar bermoqda.

“Bu kabi holatlarni, albatta, qoralayman va bunday ishlarda ham jazo muqarrar bo‘lishi, qo‘l urgan, aybdor deb topilganlar o‘z jazosini olishi kerak.

Xotin-qizlarga nisbatan taziq va zo‘ravonlik holatlarining ko‘p kuzatilayotganiga sabab shuki, avvalo, bu odamlarning ma’naviyatiga, oiladagi tarbiyasiga bog‘liq. Biz oiladagi tarbiyani yanada kuchaytirishimiz, aholi Oila kodeksiga binoan farzand tarbiyasiga er-xotin birdek majbur ekanini bilishi, oilaviy qadriyatlarini mustahkamlashi kerak. Biz boshqa davlatlardan farqli ravishda, oilaviy qadriyatlarni hali ham saqlab turibmiz va buni saqlashga barchamiz harakat qilyapmiz. Oilada kattalarga hurmat, yoshlarga izzat ko‘rsatib, oilaning har bir a’zosining xonadonda o‘z o‘rni bor ekanini bilamiz va shu tariqa ming yillar davomida o‘zbek oilasi shakllanib kelgan. Mana shu o‘zbek oilasining qadriyatlarini, urf-odatlarini, ayniqsa, qizlarga, onalarga nisbatan e’tiborni kuchaytirish zarur. Bu haqda din arkonlarida ham bejiz aytilmaydi. Oiladagi tarbiya va muhitga ham juda ko‘p narsa bog‘liq.

Shuningdek, hozirgi paytda qonunchilikda ham juda katta o‘zgarishlar bo‘lyapti. Har bir inson qonunlar ishlayotganini va uni hurmat qilib, itoat qilishni bilishi kerak, deb o‘ylayman. Barcha o‘z haq-huquqini bilishi, qonunlarni targ‘ib qilishi lozim”, — dedi Ma’rufova.

Uning qayd etishicha, yaqin orada O‘zbekistonning 14 ta hududida ikkitadan zo‘rlik ishlatishdan jabr ko‘rgan xotin-qizlarni reabilitatsiya qilish markazlari o‘z faoliyatini boshlaydi.

“Kuni kecha Prezidentning ‘Zo‘rlik ishlatishdan jabr ko‘rgan xotin-qizlarni reabilitatsiya qilishga oid qo‘shimcha chora-tadbirlar to‘g‘risida’gi qarori chiqdi. Yaqinda mamlakatning 14 ta hududida ikkitadan reabilitatsiya markazlari ochiladi. Markazlar davlat budjetidan moliyalashtiriladi, u yerlarda psixolog, ruhshunos, tibbiyot xodimi kabi yetuk mutaxassislar faoliyati yo‘lga qo‘yiladi. Respublika markazi hududlardagi markazlar faoliyatini muvofiqlashtirib boradi. Ichki ishlar, Sog‘liqni saqlash, Bandlik va mehnat munosabatlari, Xalq ta’limi vazirliklari, Bosh prokuratura, Inson huquqlari bo‘yicha ombudsman singari tashkilotlar markazlar bilan bevosita hamkorlikda ishlaydi. Chunki markazlarga murojaat qilayotgan xotin-qizlar o‘zlariga har tomonlama ko‘mak olishlari kerak”, — dedi vazir o‘rinbosari.