Самарқанд вилояти Булунғур туманида жойлашган «Юқори нуқта» ЙПХ масканида тўхтатилган Nexia автомобили ичида ҳеч қандай ҳужжатлари бўлмаган гўшт маҳсулотлари борлиги аниқланди. Бу ҳақда «Postda» газетаси хабар берди.
Қашқадарё—Тошкент йўналишида ҳаракатланиб келаётган М.Ф. исмли фуқаро ўзининг машинаси юкхонасида ва салонда ветеринария-санитария талабларига жавоб бермайдиган 141 килограмм оғирликдаги гўшт маҳсулотларини олиб кетаётган бўлган.
Шунингдек, ушбу автомашина билан бирга ҳаракатланиб келаётган, Н.Б. бошқарувидаги Nexia русумли автотранспорт воситаси ҳам текширилганида, унинг ҳам юкхонаси ва салони ичида ветеринария-санитария талабларига жавоб бермайдиган, келиб чиқиши номаълум бўлган 46 килограмм оғирликдаги гўшт маҳсулоти борлиги аниқланган.
Экспертиза текширув натижасига кўра, ушбу гўшт маҳсулотлари истеъмолга яроқсизлиги туфайли тегишли тартибда йўқ қилинган.
Аввалроқ Қашқадарёда истеъмолга яроқсиз 800 кг гўштни машина салони ва юкхонасида олиб кетаётган шахслар аниқлангани, Фарғонада мушук гўштини сотганлар ушлангани тўғрисидаги хабарлар рад этилгани ҳамда Навоийда санитария қоидаларини бузган ҳолда 15 бош қўй гўштини Тошкентга олиб келаётган Cobalt ҳайдовчиси жаримага тортилгани ҳақида хабар қилинганди.
Изоҳ (0)