O‘zbekiston bosh prokurorining 21-may kungi buyrug‘i bilan Andijon shahar prokurori lavozimida ishlab kelayotgan adliya maslahatchisi Qurbonali Asqarov o‘z xohishiga ko‘ra bergan arizasiga asosan lavozimidan ozod etildi. Bu haqda Bosh prokuratura matbuot xizmati xabar berdi.
Ma’lum qilinishicha, Qurbonali Asqarovning lavozimidan ozod etilishi 17-may kuni xalq deputatlari Andijon shahar Kengashining navbatdan tashqari sessiyasida ro‘y bergan holatlar bilan bog‘liq emas.
Eslatib o‘tamiz, xalq deputatlari Andijon shahar kengashining 17-may kuni o‘tkazilgan navbatdagi sessiyasida deputatlar tintuvdan o‘tkazilgani, ushbu sessiyada Andijonda yer sotuvchilarning kirdikorlarini fosh qilib yurgan deputatni prokuror taqdimnomasiga ko‘ra daxlsizlik huquqidan mahrum qilingani haqida xabar berilgan edi. Korrupsiyaga qarshi kurashish agentligi mazkur holatga munosabat bildirgan, Senat esa holat bo‘yicha o‘rganish ishlari olib borilayotganini ma’lum qilgandi.
Keyinroq Bosh prokuratura daxlsizlik huquqi bekor qilingan andijonlik deputat nimada ayblanayotgani yuzasidan bayonot bergandi.
Izoh (0)