«Одамларнинг маънавияти ва оиладаги тарбиясига боғлиқ» — Маҳалла ва оилани қўллаб-қувватлаш вазирининг биринчи ўринбосари Ўзбекистонда хотин-қизларнинг зўравонликка учраш сабаблари ҳақида

Маҳалла ва оилани қўллаб-қувватлаш вазирининг биринчи ўринбосари Гулнора Маъруфова 21 май, жума куни старт олган «Тошкент 5 ташаббус ҳаракати» ёшлар фестивалида ОАВ вакилларига берган интервьюсида аёлларга нисбатан тазйиқ ва зўравонлик ҳолатларининг ортиб бораётгани ҳамда унинг сабаблари ҳақида сўз юритди. Бу ҳақда «Дарё» мухбири Миролим Исажонов хабар бермоқда.

«Бу каби ҳолатларни, албатта, қоралайман ва бундай ишларда ҳам жазо муқаррар бўлиши, қўл урган, айбдор деб топилганлар ўз жазосини олиши керак.

Хотин-қизларга нисбатан тазиқ ва зўравонлик ҳолатларининг кўп кузатилаётганига сабаб шуки, аввало, бу одамларнинг маънавиятига, оиладаги тарбиясига боғлиқ. Биз оиладаги тарбияни янада кучайтиришимиз, аҳоли Оила кодексига биноан фарзанд тарбиясига эр-хотин бирдек мажбур эканини билиши, оилавий қадриятларини мустаҳкамлаши керак. Биз бошқа давлатлардан фарқли равишда, оилавий қадриятларни ҳали ҳам сақлаб турибмиз ва буни сақлашга барчамиз ҳаракат қиляпмиз. Оилада катталарга ҳурмат, ёшларга иззат кўрсатиб, оиланинг ҳар бир аъзосининг хонадонда ўз ўрни бор эканини биламиз ва шу тариқа минг йиллар давомида ўзбек оиласи шаклланиб келган. Мана шу ўзбек оиласининг қадриятларини, урф-одатларини, айниқса, қизларга, оналарга нисбатан эътиборни кучайтириш зарур. Бу ҳақда дин арконларида ҳам бежиз айтилмайди. Оиладаги тарбия ва муҳитга ҳам жуда кўп нарса боғлиқ.

Шунингдек, ҳозирги пайтда қонунчиликда ҳам жуда катта ўзгаришлар бўляпти. Ҳар бир инсон қонунлар ишлаётганини ва уни ҳурмат қилиб, итоат қилишни билиши керак, деб ўйлайман. Барча ўз ҳақ-ҳуқуқини билиши, қонунларни тарғиб қилиши лозим», — деди Маъруфова.

Унинг қайд этишича, яқин орада Ўзбекистоннинг 14 та ҳудудида иккитадан зўрлик ишлатишдан жабр кўрган хотин-қизларни реабилитация қилиш марказлари ўз фаолиятини бошлайди.

«Куни кеча Президентнинг ‘Зўрлик ишлатишдан жабр кўрган хотин-қизларни реабилитация қилишга оид қўшимча чора-тадбирлар тўғрисида’ги қарори чиқди. Яқинда мамлакатнинг 14 та ҳудудида иккитадан реабилитация марказлари очилади. Марказлар давлат бюджетидан молиялаштирилади, у ерларда психолог, руҳшунос, тиббиёт ходими каби етук мутахассислар фаолияти йўлга қўйилади. Республика маркази ҳудудлардаги марказлар фаолиятини мувофиқлаштириб боради. Ички ишлар, Соғлиқни сақлаш, Бандлик ва меҳнат муносабатлари, Халқ таълими вазирликлари, Бош прокуратура, Инсон ҳуқуқлари бўйича омбудсман сингари ташкилотлар марказлар билан бевосита ҳамкорликда ишлайди. Чунки марказларга мурожаат қилаётган хотин-қизлар ўзларига ҳар томонлама кўмак олишлари керак», — деди вазир ўринбосари.