Навоийда тадбиркорларга беғараз ёрдам сифатида 18 май куни 37 дона ишлаб чиқариш қурилмалари ва махсус ускуналар бепул топширилди. Бу ҳақда Бандлик ва меҳнат муносабатлари вазирлиги матбуот хизмати хабар берди.
Маълум қилинишича, қурилмалар Бандлик ва меҳнат муносабатлари вазирлиги ва БМТ Тараққиёт дастурининг «Ўзбекистонда ёшлар бандлигига кўмаклашиш» қўшма лойиҳаси доирасида амалга оширилаётган кичик бизнесни қўллаб-қувватлаш дастурининг Навоий вилоятидан саралаб олинган тадбиркорларга берилган.
Бу Навоий вилоятида аёллар ва ёшлар учун 24 та янги иш ўринларини яратишга ёрдам беради, шунингдек, 21 нафар фуқароларга замонавий касб-ҳунарларни ўрганиш ҳамда тадбиркорлик қобилиятларини ривожлантириш имкониятини яратади.
«Gazeta.uz»нинг ёзишича, тадбиркорларнинг танлаб олинган лойиҳалари қаторига ўқув марказини яратиш, болалар учун маҳсулотлар ишлаб чиқариш, тикувчилик корхонасини яратиш, озиқ-овқат ва дори-дармон етказиб бериш хизматини ташкил этиш ва бошқалар киради.
Ушбу ташаббус иштирокчилари аёллар ва ёшлар учун яратиладиган янги иш ўринлари сони, келажакда лойиҳанинг имкониятлари каби мезонлар бўйича танлов асосида танлаб олинди.
Умуман олганда, Россия томонидан молиялаштириладиган «Ўзбекистонда ёшлар бандлигини таъминлашга кўмаклашиш» лойиҳаси доирасида ва Япония ҳукуматининг молиявий кўмаги билан олти ҳудуд: Андижон, Наманган, Жиззах, Навоий, Қашқадарё ва Сурхондарё вилоятларидан 34 нафар тадбиркорга (шундан 21 нафари ёки 62 фоизи аёллар) ускуналар берилмоқда. Улар 1,3 миллиард сўмга 323 дона тикув ва IT-ускуналари, мебель ва маиший техника олади. Натижада 187 та янги иш ўринлари очилиши кутилмоқда, уларнинг 132 таси (ёки 70 фоиздан ортиғи) аёллар учун.
Изоҳ (0)