Андижон вилоятида ёшлар сиёсатини самарали амалга ошириш мақсадида республика «Ёшлар форуми» ўтказилмоқда. Бу ҳақда форумда қатнашган «Дарё» мухбири Умиджон Мамарасулов хабар берди.
Таъкидланишича, форумда республиканинг барча ҳудудларидан келган, турли соҳаларда муваффақиятларга эришган, илм-маърифат, адабиёт, санъат, касб-ҳунар, спорт соҳаларида қўлга киритган ютуқ ва марралари билан тенгдошларига ибрат бўлаётган 200 нафарга яқин ёшлар ва жамоатчилик вакиллари иштирок этмоқда.
Ёшлар ишлари агентлиги вилоят бошқармаси бошлиғи Ойбек Йўлдошевнинг маълум қилишича, форум доирасида карантин қоидаларига тўлиқ риоя қилинган ҳолда вилоятдаги 64 та сектор ҳудудида 250 га яқин турли кўнгилочар шоу-дастурлар, маданий-маърифий тадбирлар, спорт мусобақалари, танловлар, ёш тадбиркор ва ҳунармандларнинг кўргазмаларини ўтказиш режалаштирилган.
«Дарё» мухбирининг қайд этишича, ўтказилаётган спорт беллашувларида вилоятдаги мавжуд шаҳар ва туман ҳокимлари, сектор раҳбарлари ҳам фаол иштирок этиб, ўзларининг маҳоратини намоён этган. Жумладан, Асака тумани ҳокими Мансур Алихонов, сектор раҳбарлари билан биргаликда ўзбек жанг санъати бўйича вилоят биринчилиги мусобақасининг очилиш маросимида иштирок этиб, спортчиларга ушбу йўналиш бўйича мастер-класс ўтиб берган.
Пахтаобод тумани ҳокими Маҳмуд Бозоров эса кикбоксинг бўйича вилоят ҳокими кубоги учун курашда биринчилардан бўлиб рингга кўтарилиб, асакалик рақиби билан жанг ўтказган.
Марҳамат тумани ҳокими Бобирбек Йўлдошев эса Эркин Воҳидов номидаги шахмат мактабида ёшлар билан дона суриб, ақл чархи баҳсида ўзини синаб кўрган. Бундан ташқари туман ҳокими волейбол мусобақаларида ҳам иштирок этган.
Андижон туманида бўлиб ўтган велопойгачилар баҳсини туман ҳокими Абдужаббор Эгамбердиев бошлаб берган бўлса, Жалақудуқ тумани ҳокими Ҳикматилло Латипов ҳам ҳамкасбларидан ортда қолмай, футбол майдонида ўз маҳоратини синовдан ўтказган.
Изоҳ (0)