The Times gazetasi versiyasiga ko‘ra, USM Holdings asoschisi Alisher Usmonov Buyuk Britaniyaning eng boy odamlari reytingida 6-o‘rinni band etdi.
Nashr uning boyligini 13,4 milliard funt sterlingga baholadi. 2020-yilda tadbirkor yettinchi, 2019-yilda sakkizinchi o‘rinni band etgan edi.
Times’ning yozishicha, Usmonov eng saxiy milliarderlardan biri bo‘lib, oxirgi 20 yil ichida u 4,2 milliard dollarni xayriyaga sarflagan.
Xayriyaning katta qismi Rossiya va O‘zbekistonga yo‘naltiriladi, lekin 2020-yilda Usmonov 1892-yilgi Olimpiya manifestini sotib olish uchun 8,8 million dollar to‘lab, keyinchalik uni Shveysariyadagi Olimpiya muzeyiga topshirdi.
“Hayotda muvaffaqiyatga erishganlar imkoni boricha jamiyatga yordam berishi kerak, deb hisoblayman. Inson boshqa odamlarni xursand qilganda yoki hech bo‘lmaganda, qo‘lidan kelganicha yordam bergandagina baxtli bo‘lishi mumkin”, — deb tushuntirdi Usmonov o‘z falsafasini Times jurnalistlariga.
Tadbirkorning Londondagi uyi Xaygeyt shahar chekkasidagi Bichvud qarorgohida joylashgan bo‘lib, shuningdek, u Surrey grafligidagi ko‘chmas mulk va Tyudorlar davriga mansub bo‘lgan qasrga ham egalik qiladi.
Avvalroq Forbes 2020-yilda Alisher Usmonovning boyligi 5 milliard dollarga ortganini ma’lum qilgan edi. USM Holdings kompaniyasining asoschisi va asosiy aksiyadori dunyo milliarderlari ro‘yxatida 99, rossiyalik milliarderlar ro‘yxatida yettinchi o‘rinni egalladi.
Shuningdek, Alisher Usmonov O‘zbekiston xarid qilayotgan 1 million vaksinadan teng yarmini o‘z hisobidan olib berishi haqida xabar berildi.
2020-yilning aprel oyida USM Holdings o‘z aksiyadorlari Rossiyaga yangi koronavirus infeksiyasini olib kirish va tarqalishining oldini olish uchun shtab-kvartiraning ehtiyojlari uchun 2 milliard rubl ajratishini e’lon qildi. Iyul oyida esa Usmonov O‘zbekistonga Sardobadagi falokatdan jabr ko‘rganlar uchun yordam sifatida qariyb 10 million dollar ajratdi.
Izoh (0)