The Times газетаси версиясига кўра, USM Holdings асосчиси Алишер Усмонов Буюк Британиянинг энг бой одамлари рейтингида 6-ўринни банд этди.
Нашр унинг бойлигини 13,4 миллиард фунт стерлингга баҳолади. 2020 йилда тадбиркор еттинчи, 2019 йилда саккизинчи ўринни банд этган эди.
Times’нинг ёзишича, Усмонов энг сахий миллиардерлардан бири бўлиб, охирги 20 йил ичида у 4,2 миллиард долларни хайрияга сарфлаган.
Хайриянинг катта қисми Россия ва Ўзбекистонга йўналтирилади, лекин 2020 йилда Усмонов 1892 йилги Олимпия манифестини сотиб олиш учун 8,8 миллион доллар тўлаб, кейинчалик уни Швейцариядаги Олимпия музейига топширди.
«Ҳаётда муваффақиятга эришганлар имкони борича жамиятга ёрдам бериши керак, деб ҳисоблайман. Инсон бошқа одамларни хурсанд қилганда ёки ҳеч бўлмаганда, қўлидан келганича ёрдам бергандагина бахтли бўлиши мумкин», — деб тушунтирди Усмонов ўз фалсафасини Times журналистларига.
Тадбиркорнинг Лондондаги уйи Хайгейт шаҳар чеккасидаги Бичвуд қароргоҳида жойлашган бўлиб, шунингдек, у Суррей графлигидаги кўчмас мулк ва Тюдорлар даврига мансуб бўлган қасрга ҳам эгалик қилади.
Аввалроқ Forbes 2020 йилда Алишер Усмоновнинг бойлиги 5 миллиард долларга ортганини маълум қилган эди. USM Holdings компаниясининг асосчиси ва асосий акциядори дунё миллиардерлари рўйхатида 99, россиялик миллиардерлар рўйхатида еттинчи ўринни эгаллади.
Шунингдек, Алишер Усмонов Ўзбекистон харид қилаётган 1 миллион вакцинадан тенг ярмини ўз ҳисобидан олиб бериши ҳақида хабар берилди.
2020 йилнинг апрель ойида USM Holdings ўз акциядорлари Россияга янги коронавирус инфекциясини олиб кириш ва тарқалишининг олдини олиш учун штаб-квартиранинг эҳтиёжлари учун 2 миллиард рубль ажратишини эълон қилди. Июль ойида эса Усмонов Ўзбекистонга Сардобадаги фалокатдан жабр кўрганлар учун ёрдам сифатида қарийб 10 миллион доллар ажратди.
Изоҳ (0)