O‘zbekiston maktablarida yakuniy imtihonlardan o‘ta olmagan o‘quvchilarga ikki hafta o‘tgach qayta yakuniy attestatsiyadan o‘tish huquqi beriladi. Bu haqda Xalq ta’limi vazirligi axborot xizmati rahbari Laylo Rustamova ma’lum qildi.
Eslatib o‘tamiz, 26-maydan 2-iyunga qadar maktablarda 5, 6, 7, 8 va 10-sinf o‘quvchilari uchun bosqichli nazorat imtihonlari, 26-maydan 15-iyunga qadar esa 9 va 11-sinf bitiruvchilari uchun yakuniy davlat imtihonlari o‘tkaziladi. Imtihonlar og‘zaki, yozma hamda test sinovlari shaklida bo‘lib o‘tadi.
Barcha imtihonlar o‘quvchilarning sog‘lig‘ini himoyalash va karantin qoidalariga qat’iy rioya etgan holda o‘tkazilishi nazoratga olinadi. Jumladan, imtihonlar o‘tkazilishidan oldin ta’lim muassasalarida dezinfeksiya ishlari olib boriladi, o‘quvchilar imtihonlarga sanitar-gigiyena qoidalariga rioya etgan holda himoya vositasida (tibbiy niqob) kiritilib, binoga kirishdan avval tibbiy xodimlar tomonidan ularning tana harorati o‘lchanadi va oraliq masofani saqlashlari ta’minlanadi.
Agar maktab karantinga yopilgan bo‘lsa, imtihon karantin muddati tugaganidan so‘ng, karantin qoidalariga qat’iy rioya qilgan holda o‘tkaziladi.
Yillik baho va yakuniy attestatsiya natijalariga ko‘ra, umumiy o‘rta ta’lim davlat ta’lim standartlari talablarini bajarmay, “qoniqarsiz” baho olgan bitiruvchilar shu sinfda qayta o‘qishga qoldiriladi.
Xalq ta’limi vazirligi maktab ma’muriyatlaridan imtihonlarni adolatli va shaffof tashkil qilish hamda turli noqonuniy yig‘imlarning oldini olish choralarini ko‘rishni so‘ragan.
2019/2020-o‘quv yilida ushbu imtihonlar koronavirus infeksiyasi tufayli bekor qilinib, baholar uchinchi chorak ballari asosida chiqarilgandi.
Izoh (0)