Қибрай туманида 9 гектар қулупнай майдони бузилиб, вайрон қилингани ҳақида видеолавҳа ижтимоий тармоқларда тарқалиб, кенг муҳокамаларга сабаб бўлганди. Қибрай тумани ҳокимлиги фермер хўжалигига етказилган зарар белгиланган тартибда қоплаб берилишини маълум қилди.
Ҳокимлик хабарига кўра, ушбу видеолавҳада кўрсатилган ер майдони «Чинкелди» МФЙ Янгиобод қишлоғи М.Беҳбудий кўчасида жойлашган «Саидвали ҳожи» фермер хўжалигига тегишли бўлиб, жами 20,9 гектарлик майдоннинг 8 гектарига (видеода 9 гектар дейилган) қулупнай экилган.
«Саидвали ҳожи» фермер хўжалиги ер майдонларидан экин экиб фойдаланиш учун деҳқонлар билан ўзаро оғзаки (ҳеч қандай ҳужжатлар расмийлаштирилмаган) келишувга асосан иккиламчи ижарага берилган.
«Фермер хўжалигининг ер майдонлари давлат эҳтиёжлари учун олинганлиги (олдиндан огоҳлантириш хатлари берилган) муносабати билан фермер хўжалигига етказилган зарар белгиланган тартибда қоплаб берилади. Ушбу маблағлар фермер хўжалиги ҳисоб рақамига ўтказилгандан сўнг фермер хўжалиги билан иккиламчи ижарада фойдаланиб келган деҳқонларга келтирилган зарарни қоплаш ‘Саидвали ҳожи’ фермер хўжалиги томонидан амалга оширилиши бўйича далолатнома расмийлаштирилган», — дейилади ҳокимлик хабарида.
Шунингдек, келтирилган зарарни қоплаш бўйича амалга оширилган ишлар юзасидан қўшимча ахборот берилиши маълум қилинган.
Эслатиб ўтамиз, қулупнай даласи бульдозерда бузиб ташланаётгани акс этган видео ижтимоий тармоқларда 20 май куни тарқалганди. Унда деҳқонларнинг бунга қаршилик қилаётгани, воқеа жойида ички ишлар органлари ҳам борлигини кўриш мумкин. Ҳолат юзасидан Тошкент вилояти ИИБ матбуот котиби Бобур Тўлаганов изоҳ бериб, даланинг бузилишига ички ишлар ходимлари алоқадор эмаслигини билдирганди.
Изоҳ (0)