Namanganlik tadbirkor Abdunazar Nizomov otasining vasiyatini bajarish uchun 500 yillik ziyoratgohni qaytadan qurdi. Bu haqda “Daryo” muxbiri Azizbek Abduvaliyev xabar bermoqda.
Abdunazarning aytishicha, otasi A’zamjon Nizomov Hajga borish uchun yig‘ib yurgan mablag‘ini el-yurtga nafi tegadigan ishlarga sarflashni vasiyat qiladi. Otaxon 11 oy avval 71 yoshida olamdan o‘tgan.
“O‘zim tug‘ilib-o‘sgan Chortoq tumanining Koroskon qishlog‘ida nasabi payg‘ambarimizga borib taqaladigan aziz-avliyolardan Said Nizomiddin Go‘yo Muhammad va u kishining avlodlari dafn etilgan ziyoratgoh bor. Oxirgi yillarda qarovsiz holatga kelib qolgandi. Shu yerni obod qilish fikri tug‘ildi. Hududimiz tuman prokurorining sektoriga qaraydi, bu rejani ular ham qo‘llab-quvvatlab, barcha sharoitlarni yaratib berishdi”, — deydi tadbirkor.
Ziyoratgohni qayta qurish va hozirgi holiga keltirish uchun 51 kun va 300 million so‘mga yaqin mablag‘ ketdi. Yana 100 million so‘m jihozlar uchun sarflandi. Qishloq ahli ham chetda turgani yo‘q, hasharga chiqmagan qolmadi hisob.
Birinchi galda Said Nizomiddin Go‘yo Muhammad va u kishining avlodlari dafn etilgan qabrlar usti yopilib, ko‘rkam ayvon qurildi. Keyin tahoratxona, tilovatxona, ehson xonasi va oshxona barpo etildi. Yon-atrofga manzarali daraxtlar va gullar o‘tqazildi, hordiq uchun so‘ri va o‘rindiqlar o‘rnatildi.
Bunda Abdunazarning bevosita qurilish tashkilotiga rahbarlik qilishi ham qo‘l keldi.
“O‘zimni yengil his etyapman, ichimga yorug‘lik kirgandek bo‘ldi. Otamning vasiyatlarini bajardim, qolaversa, hamyurtlarimning duosini olyapman”, — deydi Abdunazar.
O‘zini Said Nizomiddin Go‘yo Muhammadning avlodi sifatida tanishtirgan Hojiakbar Ahmedovning aytishicha, bu zot 1491—1595-yillarda yashab o‘tgan. O‘sha paytlarda bu kishiga teng ulamo bo‘lmagan. Hukmdorlar tomonidan hadya qilinadigan mablag‘ni yil davomida yetim-yesir, beva-bechoralarni taomlantirishga sarflagani, ularga ta’lim-tarbiya bergani bitilgan.
Hozirgi kunda xalq tilida “Tolmozor” deb ataladigan mazkur manzildan ziyoratchilarning qadami uzilmaydi. Ular bu yerda saqlab qo‘yilgan ziyoratgohning eski ko‘rinishi fotolari va bugungi holatini taqqoslab, hayratlarini izhor etishmoqda.
Izoh (0)