Isroil—Falastin nizosining keskinlashuvi oqibatida infratuzilma vayron bo‘lishi tufayli, G‘azoda 325 ming kishi shoshilinch ravishda suv ta’minoti va kanalizatsiyaga ehtiyoj sezmoqda. Bu haqda BMT Bolalar fondi (YuNISEF) ijrochi direktori Genriyetta For ma’lum qildi, deb yozadi “Kommersant”. U eng zarur buyumlarni xavfsiz yetkazib berish mumkin bo‘lishi uchun mintaqada gumanitar yo‘laklar yaratishga chaqirdi.
“Bizning hisob-kitoblarimiz bo‘yicha, 325 ming kishi suv ta’minoti va kanalizatsiyaga shoshilinch tarzda ehtiyoj sezmoqda, ularsiz o‘limga olib keladigan darajada xavfli yuqumli kasalliklarga duch kelish xavfi oshadi”, — dedi For.
Uning qayd etishicha, fond eng zarur mahsulotlarni, shu jumladan, yonilg‘i, dori-darmonlar, birinchi yordam aptechkalari va COVID-19’ga qarshi vaksinalarni bepul yetkazib berish uchun gumanitar yo‘laklar yaratishga chaqiradi.
YuNISEF mintaqada gumanitar yarashuvga, shuningdek, nizoni uzoq muddatli siyosiy hal qilishga da’vat etadi. “Nizo davom etgan har bir kun Falastin va Isroildagi bolalarni azobga soladi… Ular anchadan buyon davom etib kelayotgan zo‘ravonlik va qo‘rquvdan iborat dahshatli voqealardan ko‘ra yaxshiroq narsalarga munosibdir”, — dedi For.
YuNISEF hisob-kitoblariga ko‘ra, G‘azoda kamida 60 nafar bola nizo keskinlashuvi oqibatida halok bo‘lgan, 444 nafari jabrlangan, qariyb 30 ming bola esa yashash joyini tark etishga majbur bo‘lgan.
Izoh (0)