Rossiya prezidenti Vladimir Putin Falastin—Isroil mojarosida har ikki tomonni zo‘ravonliklarga chek qo‘yish va murosa yo‘llarini izlashga chaqirdi, deb yozadi “TASS”.
Foto: “RIA Novosti”
“So‘nggi kunlarda Yaqin Sharqdagi keskinlik tom ma’noda avj olganiga guvoh bo‘lmoqdamiz va vaziyatning rivojlanishini xavotir bilan kuzatmoqdamiz. Falastinliklar va isroilliklar o‘rtasidagi qarama-qarshilik allaqachon ko‘plab fuqarolarning, shu jumladan bolalarning qurbon bo‘lishiga olib keldi”, — degan Putin.
“Biz har ikki tomon zo‘ravonlik harakatlariga chek qo‘yishi hamda Birlashgan Millatlar Tashkiloti (BMT) Xavfsizlik kengashining tegishli qarori va xalqaro huquqning umume’tirof etilgan tamoyillari asosida faol ravishda yechim izlashi shart deb bilamiz”, — deya ta’kidlagan Rossiya prezidenti.
Putinning qayd etishicha, Rossiya BMT Xavfsizlik kengashining doimiy a’zosi sifatida “o‘tkir inqirozlarni tartibga solish va boshqa ko‘plab dolzarb xalqaro muammolarni hal qilishga o‘zining munosib hissasini qo‘shishga intilib keladi”.
“Biz Suriyadagi vaziyatni normallashtirish uchun juda ko‘p ishlar qilganmiz, ushbu mamlakatda tinch siyosiy muloqot o‘rnatishga yordam berib kelmoqdamiz. Rossiyaning vositachiligi tufayli Tog‘li Qorabog‘ mojarosi zonasida jangovar harakatlar to‘xtatilgan, to‘liq sulh ta’minlangan, yarashuv jarayoni va qochqinlarning qaytishi davom etmoqda”, — deya qayd etgan u.
Avvalroq BMT bosh kotibi Isroil va G‘azo sektori o‘rtasidagi o‘t ochishlarni zudlik bilan to‘xtatishni talab qilgan edi. Turkiya esa falastinliklarni himoya qilish uchun xalqaro mexanizm yaratishga chaqirdi. Xitoy Falastinni Isroil bilan nizoda qo‘llab-quvvatlashga va’da berdi.
O‘z navbatida O‘zbekiston ham Isroil va Falastinni zo‘ravonlikni zudlik bilan to‘xtatishga chaqirdi.
Falastin—Isroil nizosining 2014-yildan buyon kuzatilgan eng kuchli avj olishi may oyida Isroil hukumatining Quddusda bir qator arab oilalarini ko‘chirib yuborish qaroridan keyin boshlandi. Bu noroziliklarni keltirib chiqardi hamda Quddusda arab namoyishchilar va Isroil politsiyasi o‘rtasidagi to‘qnashuvlarga sabab bo‘ldi.
Vaziyatga HAMAS aralashdi. Isroil uning politsiyani olib ketish haqidagi talablarini bajarmaganidan keyin guruh raketalar otishni boshladi. Bunga javoban Isroil G‘azo sektorini o‘qqa tutdi.
