OAV: Rossiyada chet ellik talabalarning mamlakatda bo‘lib turish tartibi soddalashtiriladi

Rossiya Ichki ishlar vazirligi chet ellik talabalarning Rossiyada bo‘lib turishini soddalashtiradigan qonun loyihasini ishlab chiqdi. Bu haqda hujjatga asoslanib “Kommersant” xabar berdi.

Qayd etilishicha, ushbu tashabbus Rossiya universitetlari va ilmiy tashkilotlarida to‘liq shaklda o‘qiyotgan chet el fuqarolari va fuqaroligi bo‘lmagan shaxslar uchun “maxsus huquqiy rejimni o‘rnatishga” qaratilgan.

Hozirgi kunda chet ellik talabalar vaqtincha yashash uchun ruxsatnomani hukumat tomonidan belgilangan kvota doirasida umumiy asosda oladi. Bunday ruxsatnomaning amal qilish muddati uch yil. Ta’kidlanishicha, yangi qonun loyihasida chet ellik talabaning iltimosiga qarab, o‘qish davri va keyingi 180 kun uchun ruxsatnoma chiqarilishi taklif etiladi. Shu bilan birga, chet ellik talabalar rus tilini, Rossiya tarixi va qonunchilik asoslarini bilish faktini tasdiqlash majburiyatidan ozod qilinadi va har yili yashash joyi to‘g‘risida bildirishnoma yuborishi talab etilmaydi.

Bundan tashqari, qonun loyihasida chet ellik talabalarning o‘qishni bitirganidan so‘ng uch yil ichida Rossiyada istiqomat qilish uchun guvohnoma olishini soddalashtirish nazarda tutilgani aytilmoqda.

Vazirlik qayd etishicha, taklif qilinayotgan o‘zgartirishlar Rossiya Ichki ishlar vazirligining hududiy organlari va davlat ta’lim muassasalari yoki ilmiy muassasalari zimmasidagi yukni yengillashtiradi, shuningdek, chet ellik talabalarni Rossiya jamiyatiga qo‘shilishiga hamda kasbiy va ilmiy salohiyat egalarini mamlakatda olib qolishga yordam beradi.

Xabarga ko‘ra, Rossiya Yuristlar assotsiatsiyasi kengashi raisi Vladimir Gruzdev qonun loyihasini ijobiy baholagan va bu haqiqatan ham chet ellik talabalarning Rossiyada bo‘lib turishini osonlashtirishini ta’kidlagan. “Chet el fuqarolari yashash joylarida migratsiya uchun ro‘yxatdan o‘tadi. Talabalar universitetlardan chetlatilgan taqdirda, yashash uchun berilgan ruxsatnoma o‘ttiz kun ichida tugatiladi”, — dedi Gruzdev.

2020-yilning avgustida Rossiya universitetlari va kasb-hunar kollejlarida tahsil olayotgan chet elliklarga ruxsatnoma yoki patent olish zaruriyatisiz soddalashtirilgan tartibda ishga joylashish imkonini beradigan qonun kuchga kirgan edi. Davlat Dumasi raisi Vyacheslav Volodin ushbu chora Rossiya ta’lim muassasalarida tahsil olayotgan chet el fuqarolari sonini kamida ikki baravar oshirishini aytgan.