Rossiya prezidenti Vladimir Putin va Xitoy rahbari Si Szinpin 19-may, chorshanba kuni bo‘lib o‘tgan videoselektor yig‘ilishida Xitoyda to‘rtta atom energobloki qurilishiga start berdi.
Qayd etilishicha, qurilishga shaylik to‘g‘risidagi hisobotlarni eshitgandan so‘ng davlatlar rahbarlari ishga kirishishni buyurdi. Xususan, Tyanvan AESning yettinchi va sakkizinchi bloklari hamda Syudapu AESning uchinchi va to‘rtinchi bloklari quriladi.
“Ishonchim komilki, Rossiya va Xitoyni oldinda ko‘plab ulug‘vor va muvaffaqiyatli ikki tomonlama tashabbuslar kutib turibdi. Biz atom elektr stansiyalarini hamkorlikda qurish tajribasini, past uglerodli va boshqa texnologiyalarni ishlab chiqish va joriy etishda innovatsion sheriklikni yanada rivojlantirishga tayyormiz”, — dedi Putin.
Uning so‘zlariga ko‘ra, bu “haqiqatan ham ikki mamlakatning birgalikda jahon bozorlarini toza energiya bilan ta’minlashga, issiqxona zararli gazlarini kamaytirishga, xalqaro iqlim kun tartibini amalga oshirishga, va umuman olganda, progressiv va barqaror global rivojlanishni ta’minlashga katta hissa qo‘shish imkonini beradi”.
O‘z navbatida, Si Szinpin yanada ochiq global energiya boshqaruv tizimini yaratishni taklif qildi. “Biz dunyo miqyosida adolatli, yanada ochiq global energiya boshqaruvi tizimini shakllantirishga yordam berishimiz kerak”, — dedi u.
Si Szinpinning so‘zlariga ko‘ra, barcha mamlakatlar uchun umumiy vazifa iqlim o‘zgarishiga qarshi kurashishdir.
Putinning ta’kidlashicha, yangi bloklarni 2026 va 2028-yillarda foydalanishga topshirish rejalashtirilgan.
Eslatib o‘tamiz, Rossiya prezidenti Vladimir Putin va Turkiya prezidenti Rajab Toyyib Erdo‘g‘on 10-mart kuni Turkiyadagi “Akkuyu” atom elektr stansiyasi (AES)ning uchinchi energiya bloki qurilishiga start bergan edi. Turkiya prezidenti stansiyaning so‘nggi blokini qurish 2022-yilga rejalashtirilganini ma’lum qilgan.
Izoh (0)