Iordan daryosining g‘arbiy sohilida va Isroilning arablar yashaydigan boshqa mintaqalarida umumiy ish tashlash e’lon qilindi, deb yozmoqda Anadolu agentligi.
Xabarga ko‘ra, Isroilning G‘azo sektoriga hujumlari va Sharqiy Quddusdagi tajovuzkor harakatlar uchun Falastin siyosiy guruhlari va kasaba uyushmalarining chaqirig‘iga binoan falastinliklar ish tashladi.
18-may kuni ertalab Iordan daryosining g‘arbiy qirg‘og‘idagi va arablar yashaydigan Isroil shaharlaridagi savdo do‘konlari yopildi. G‘arbiy sohilda ish tashlashlarga xususiy muassasalar, universitetlar va banklar ham qo‘shildi, mintaqada yo‘l harakati jadalligining pasayishi kuzatilmoqda .
Al-Xalil shahri milliy va islomiy kuchlar koordinatori Fahmi Shahinning aytishicha, Falastin xalqi Isroilning vahshiy hujumlariga va xalqaro hamjamiyatning ushbu harakatlarga nisbatan pozitsiyasiga qarshi g‘azabini ifodalash uchun ish tashlashga kirishgan.
“1948-yilgi hududlar deb bilinadigan barcha Falastin yerlarini qamrab olgan bunday aksiyada falastinliklarning ishtiroki katta ahamiyatga ega. Falastin guruhlari o‘zlarining hamjihatligi va birdamligini oshirmoqda, ish tashlash kuchaygandan keyin barcha tomondan kurash davom etadi”, — dedi Shahin.
So‘nggi ma’lumotlarga ko‘ra, Isroilning G‘azo sektoriga bergan zarbalari natijasida 10-maydan beri halok bo‘lgan falastinliklar soni 217 kishiga yetgan. Ulardan 63 nafari bolalar, 36 nafari ayollar. Shuningdek, 1500 kishi jarohat olgan.
Xalqaro hamjamiyatning tinchlikka chaqiriqlarini e’tiborsiz qoldirgan holda Isroil qamalda qolgan G‘azoga ham quruqlikdan, ham havodan hujumni davom ettirmoqda.
Birlashgan Millatlar Tashkiloti xabariga ko‘ra, Isroil mudofaa kuchlarining G‘azo sektoriga bergan zarbalari oqibatida kamida 52 ming falastinlik o‘z uylarini tark etishga majbur bo‘ldi. Tashkilotning Gumanitar masalalarni muvofiqlashtirish boshqarmasi matbuot kotibi Yens Laerke ma’lum qilishicha, boshqarma qo‘l ostidagi 58 ta maktabdan 47 ming falastinlik uchun boshpana sifatida foydalanilmoqda.
Uning so‘zlariga ko‘ra, Isroil G‘azo sektoriga olib boradigan deyarli yagona savdo yo‘li — “Karim Abu Salim” nazorat-o‘tkazish punktini ochish niyatidaligini ma’lum qilgan.
Laerke G‘azoda insonparvarlik holatining yomonlashayotganiga e’tibor qaratdi va Tel-Avivni G‘azo bilan chegarada joylashgan Bayt-Xanun nazorat punktini ochishga chaqirdi.
Boshqarma vakili G‘azoga elektr energiyasini yetkazib berish bilan bog‘liq muammolarga ham to‘xtalib, hududga elektr energiyasi kuniga atigi 6-8 soat davomida yetkazib berilayotganini qayd etib o‘tdi.
Falastin—Isroil nizosining 2014-yildan buyon kuzatilgan eng kuchli avj olishi may oyida Isroil hukumatining Quddusda bir qator arab oilalarini ko‘chirib yuborish qaroridan keyin boshlandi. Bu noroziliklarni keltirib chiqardi hamda Quddusda arab namoyishchilar va Isroil politsiyasi o‘rtasidagi to‘qnashuvlarga sabab bo‘ldi.
Vaziyatga HAMAS aralashdi. Isroil uning politsiyani olib ketish haqidagi talablarini bajarmaganidan keyin guruh raketalar otishni boshladi. Bunga javoban Isroil G‘azo sektorini o‘qqa tutdi.
Izoh (0)