Janubiy Koreya hukumati bir necha yil oldin KXDRda atom elektr stansiyasini qurish imkoniyatini ko‘rib chiqqani haqidagi ma’lumotni rad etdi. Bu haqda birlashish vaziri Li In Yon 1-fevral kuni TBS radiosiga bergan intervyusida ma’lum qildi, deb xabar bermoqda “Izvestiya”.

Bundan avval Janubiy Koreya telekanallaridan biri prezident Mun Chje In ma’muriyati 2018-yil aprel oyida KXDR rahbari Kim Chen In bilan bo‘lib o‘tgan birinchi sammitdan so‘ng AES qurishni rejalashtirganligini ko‘rsatuvchi hujjatlar borligini bildirgan.

Mansabdorning so‘zlariga ko‘ra, Birlashish vazirligi hech qachon Shimoliy Koreyada AES qurish masalasini muhokama qilmagan, deb yozadi “TASS”. Shuningdek, uning vazirligi kanal materiallarida tilga olingan hujjatlarni o‘rganganligini, ammo AES haqida to‘g‘ridan to‘g‘ri qaydlar topilmaganini qo‘shimcha qilgan.

Li In Yon bo‘layotgan barcha voqealarni muxolifatning shunchaki navbatdagi parlament saylovlari arafasida hukmron partiyani obro‘sizlantirishga qaratilgan harakati deb baholagan.