Россия президенти Владимир Путин ва Хитой раҳбари Си Цзиньпин 19 май, чоршанба куни бўлиб ўтган видеоселектор йиғилишида Хитойда тўртта атом энергоблоки қурилишига старт берди.
Қайд этилишича, қурилишга шайлик тўғрисидаги ҳисоботларни эшитгандан сўнг давлатлар раҳбарлари ишга киришишни буюрди. Хусусан, Тянван АЭСнинг еттинчи ва саккизинчи блоклари ҳамда Сюдапу АЭСнинг учинчи ва тўртинчи блоклари қурилади.
«Ишончим комилки, Россия ва Хитойни олдинда кўплаб улуғвор ва муваффақиятли икки томонлама ташаббуслар кутиб турибди. Биз атом электр станцияларини ҳамкорликда қуриш тажрибасини, паст углеродли ва бошқа технологияларни ишлаб чиқиш ва жорий этишда инновацион шерикликни янада ривожлантиришга тайёрмиз», — деди Путин.
Унинг сўзларига кўра, бу «ҳақиқатан ҳам икки мамлакатнинг биргаликда жаҳон бозорларини тоза энергия билан таъминлашга, иссиқхона зарарли газларини камайтиришга, халқаро иқлим кун тартибини амалга оширишга, ва умуман олганда, прогрессив ва барқарор глобал ривожланишни таъминлашга катта ҳисса қўшиш имконини беради».
Ўз навбатида, Си Цзиньпин янада очиқ глобал энергия бошқарув тизимини яратишни таклиф қилди. «Биз дунё миқёсида адолатли, янада очиқ глобал энергия бошқаруви тизимини шакллантиришга ёрдам беришимиз керак», — деди у.
Си Цзиньпиннинг сўзларига кўра, барча мамлакатлар учун умумий вазифа иқлим ўзгаришига қарши курашишдир.
Путиннинг таъкидлашича, янги блокларни 2026 ва 2028 йилларда фойдаланишга топшириш режалаштирилган.
Эслатиб ўтамиз, Россия президенти Владимир Путин ва Туркия президенти Ражаб Тоййиб Эрдўғон 10 март куни Туркиядаги «Аккую» атом электр станцияси (АЭС)нинг учинчи энергия блоки қурилишига старт берган эди. Туркия президенти станциянинг сўнгги блокини қуриш 2022 йилга режалаштирилганини маълум қилган.
Изоҳ (0)