Belarusda Tut.by muxolifat nashrining 12 nafar xodimi hibsga olindi. Bu haqda nashr o‘z Telegram kanalida ma’lum qildi, deb yozadi “Korrespondent.net”.
Shuningdek, nashr kompaniya ofisida tintuv o‘tkazilgani haqida xabar qilgan. Nashrning bosh muharriri Marina Zolotovaning uyida ham tintuv o‘tkazilgan va shundan so‘ng u so‘roq qilish uchun Moliyaviy tekshiruv bo‘limi (MTB)ga olib ketilgan.
Bosh muharrirning turmush o‘rtog‘iga tayanib berilgan xabarga ko‘ra, “tergov harakatlari vaqtincha olib borilmasligi” aytilib, Zolotovaga advokat bilan uchrashishga ruxsat berilmagan va uni Okrestin ko‘chasidagi vaqtinchalik saqlash hibsxonasiga o‘tkazish rejalashtirilmoqda.
Hibsga olinganlar orasida nashr bosh direktori, bosh hisobchi va uning o‘rinbosari, direktor o‘rinbosari, kadrlar bo‘yicha direktor, ikki bosh muharrir o‘rinbosari, bir jurnalist, bir dasturchi muhandis, biznes tahlilchi, marketing bo‘limi boshlig‘i va bir menejer bor.
Nashr, shuningdek, bosh muharrir o‘rinbosarlaridan biri Maksim Gayko va dasturchi-muhandis Vitaliy Kalinovskiyning so‘roqdan so‘ng maxfiy ma’lumotlarni oshkor qilmaslik to‘g‘risidagi kelishuv asosida qo‘yib yuborilgani haqida xabar qildi. Endilikda ular ishda guvoh sifatida ishtirok etmoqda
Shuningdek, tahririyat Tut.by ofisidagi voqealarni yoritish uchun ertalab kelgan yana uch nafar jurnalistning g‘oyib bo‘lgani, ular bilan bog‘lanib bo‘lmayotgani haqida xabar berdi. Politsiya esa nashrga Minsk ichki ishlar bo‘limiga biror kimning bedarak yo‘qolgani to‘g‘risida xabar kelib tushmaganini aytdi. MTB va Tergov qo‘mitasida ham bu haqda ma’lumot yo‘qligi aytilmoqda.
18-may kuni Belarus hukumati Tut.by yangiliklar portalini bloklab qo‘ygan va buni “taqiqlangan ma’lumotlarni joylashtirish nuqtayi nazaridan OAV to‘g‘risidagi qonun buzilishining ko‘plab faktlari” bilan izohlagan. Shundan so‘ng MTB xodimlari tahririyat ofisiga kelgan va katta miqdordagi soliqni to‘lashdan bo‘yin tovlash bo‘yicha jinoyat ishi qo‘zg‘atilgan.
MTB nashrning 2019-yilda High-Tech Park (HTP) rezidenti bo‘lganini, ammo “HTP rezidentlari uchun ruxsat berilgan faoliyatga nomuvofiq” daromad olganini da’vo qilmoqda. Rasmiylarning fikricha, nashr hukumat yordamidan foydalangan holda davlatga juda katta miqdordagi zarar yetkazgan.
Similarweb ma’lumotlariga ko‘ra, TUT.BY Belarusning eng yirik yangiliklar portali bo‘lib, u 2000-yildan beri faoliyat yuritib kelmoqda. Nashr jurnalistlari respublikada 2020-yil yoz oxirida, kuzda va qishda bo‘lib o‘tgan prezidentlik saylovlaridan keyingi norozilik namoyishlarini faol ravishda yoritib borgan.
Izoh (0)