Qashqadaryolik bloger Azizbek Yazdurdiyev tanqididan so‘ng, Mirishkor tumanidagi turkman shoiri Maxtumquli byusti qayta ta’mirlandi. Bu haqda “Daryo”ga tuman hokimligi axborot xizmati ma’lum qildi.
Ta’kidlanishicha, turkman shoiri byustining ochilish marosimi 19-may kuni bo‘lib o‘tgan.
“Maxtumquli barcha turkiy xalqlar qatori o‘zbek xalqining ham sevimli shoiriga aylanib qolgan. Uning ma’naviy-axloqiy mavzudagi teran pand-nasihatga yo‘g‘rilgan ma’nodor she’rlari kirib bormagan o‘zbek xonadoni yo‘q. Maxtumquli nomini bilmaydigan birorta o‘zbek topilmaydi desak, mubolag‘a bo‘lmas. Maxtumquli she’rlari o‘zining xalqchil ruhi tufayli asrlar davomida el baxshilari, xalfalari va hofizlari tomonidan kuylanib, shoirlarga ilhom berib, adabiy davralar va she’riyat kechalari, gap-gashtaklarda o‘qilib kelgan”, — degan tadbirda so‘z olgan tuman hokimi Sherali Sanayev.
Aytilishicha, tadbirda so‘z olgan viloyat Turkman milliy madaniyat markazi rahbari Umrizoq Quvvatovlar tuman hokimi boshchiligidagi mas’ullarga tashakkur izhor qilgan.
Hokimlik axborot xizmatining eslatishicha, avvalroq bloger Azizbek Yazdurdiyev tumanning Pomuq shaharchasida joylashgan byust mas’ullar e’tiboridan chetda qolganini yozib, masalaga jamoatchilik e’tiborini qaratgan.
Izoh (0)