Ўзбекистонда коронавирусга қарши фойдаланилаётган у ёки бу вакцинани яхши ёки ёмон деб айтиш жуда қийин. Бу ҳақда соғлиқни сақлаш вазири ўринбосари — Санитария-эпидемиологик осойишталик ва жамоат саломатлиги хизмати бошлиғи, бош давлат санитария врачи Баҳодир Юсупалиев айтди, деб хабар бермоқда «Podrobno.uz».
«Вакцинанинг самарадорлиги эмлашдан сўнг одамда у ёки бу касаллик билан, айни ҳолатда коронавирус билан касалланмаслик имконини берувчи яхши иммунитет пайдо бўлишида намоён бўлади. Ҳозир бу иммунитет шакллангани ва у қанча вақт давомида ишлаши ҳақида гапириш қийин», — деган у 18 май, миллион дозадан иборат ўзбек—хитой вакцинасининг учинчи партияси олиб келинган кун.
Унинг сўзларига кўра, у ёки бу вакцинани яхши ёки ёмон деб айтиш жуда қийин, чунки ушбу препаратларни ишлаб чиқариш муайян вақт талаб қилади. Бу бир йил эмас, икки, уч, тўрт, айрим ҳолларда 10 йил бўлиши мумкин. Шунга кўра, у ёки бу вакцинанинг самарадорлиги ҳақида айтиш учун маълум бир вақт керак.
«Шунга қарамай, ўтказилган тадқиқотлар Ўзбекистонда қўлланилаётган учала вакцина ҳам самарали эканлиги ва аҳолида керакли иммунитетни шакллантиришини кўрсатмоқда», — деб таъкидлаган у.
Баҳодир Юсупалиев, шунингдек, расмийларнинг самарали ҳаракатлари туфайли бугунги кунда ўзбекистонликларда исталган вакцинани — Ҳиндистонда ишлаб чиқарилган AstraZeneca (икки дозада), ўзбек—хитой ZF-UZ-VAC2001 (уч дозада) ва Россиянинг «Спутник V» (икки дозада) вакцинасини танлаш имконияти борлигини қўшимча қилган.
Эслатиб ўтамиз, Ўзбекистонда коронавирус инфекциясига қарши оммавий эмлаш тадбирлари 1 апрелдан бошланди. Эмлаш ихтиёрий ва бепул, вакцина олишдан бош тортганларга ҳеч қандай чора кўрилмайди. Мамлакатда июнь ойи охиригача 4 миллион кишини коронавирусга қарши эмлаш режалаштирилган.
Соғлиқни сақлаш вазирлиги маълумотларига кўра, 18 майга келиб Ўзбекистонда коронавирусга қарши 1 412 312 доза вакцинадан фойдаланилди, уларнинг 286 317 дозаси иккинчи босқичда қўлланилган. Шунга кўра, мамлакатда жами эмланганлар сони 1 125 995 кишини ташкил этмоқда.
Баҳодир Юсупалиевнинг ўзи 3 май куни ўзбек—хитой ZF-UZ-VAC2001 вакцинаси билан эмланган.
Изоҳ (0)