Андижон шаҳрида Мотамсаро она ҳайкалига ҳурматсизлик қилган 37 ёшли эркак жавобгарликка тортилди. Бу ҳақда «Ёшлар» телеканалида маълум қилинди.
Ижтимоий тармоқларда 3 нафар фарзанди бор 37 ёшли З.Қ. исмли фуқаро ҳайкал устига чиқиб ётиб олгани тасвирланган видео тарқалди. «Онахоннинг қучоғида ётибман... Кимлигини билмайман, сен танийсанми? Мен ҳам танимайман», — дейди у.
Ушбу фуқарога нисбатан Маъмурий жавобгарлик тўғрисидаги кодекснинг 183-моддаси (майда безорилик) билан 15 сутка маъмурий қамоқ жазоси тайинланган.
Маълум бўлишича, бу З.Қ. томонидан содир этилган иккинчи ҳуқуқбузарлик ҳисобланади. Бундан олдин у ҳаракатланаётган поезд остига ётиб олгани тасвирланган видеони интернетда тарқатган эди. Эркак қилган ишидан узр сўраб, қайта бундай иш қилмасликка ваъда берган.
«Бундан буёғига яхши одам бўлиб, яхши ҳаётда яшашга ҳаракат қиламан. Ўйламаган хатти-ҳаракатим шунақа вазиятга олиб келди. Ёшларга бу ибрат бўлсин. Халқимиздан кечирим сўрайман, узр», — дейди у.
Эълон қилинган кадрлардан кўриш мумкинки, ҳуқуқбузар эркак ҳайкални артиб, атрофини тозалаб қўйган.
Аввалроқ Каттақўрғон боғида жойлашган Алишер Навоий ҳайкали олдида ножўя ҳаракат содир этгани акс этган видео тарқалганди. Кейинроқ ҳайкалга тупурган йигит унинг оёғини кийимлари билан тозалаган. 11 май куни худди шу жойда ноўрин хатти-ҳаракатлар қилган TikTok фойдаланувчиси 15 суткага қамалгани ҳақида хабар берилганди.Шунингдек, Бухорода TikTok учун дрифт қилган ҳайдовчининг «Жигули»си жарима майдонига жойлаштирилгани, самарқандлик икки йигит TikTok’да лайк йиғиш учун ўзини томдан ташлагани ҳамда ҳаракатланаётган Spark устига чиқиб олган йигит видеосини TikTok’ка жойлаштирганлар жаримага тортилгани ҳақида хабар берилганди.
Изоҳ (0)